Վերջին շրջանում սփյուռքահայ մտավորականները համախմբվում են՝ կարծես թե մասնակից դառնալու տեղի ունեցող փոփոխություններին, զարգացումներին: Օրերս աշխարհահռչակ երգիչ Սերժ Թանկայնը ստորագրահավաք նախաձեռնել: Նա իր ֆեյսբուքյան էջում, դիմելով հայրենակիցներին, նշել էր. «Անկախությունը շատ քիչ բան է նշանակում, երբ հասարակության ստվար զանգվածը դժգոհ է, այդ իսկ պատճառով ես և իմ մի խումբ ընկերներ աջակցության հայտարարություն ենք պատրաստել Հայաստանի ժողովրդի և Հայաստանում բարեփոխումներ անելու նրանց կոչի համար: Ստորագրե՛ք, եթե համաձայն եք»:
Այս նախաձեռնությանը միացել են Ատոմ Էգոյանը, Արսինե Խանջյանը… «Առաջին լրատվական»- ի հետ թեմայի շուրջ զրույցում երգիչ, երգահան Եղիշե Պետրոսյանը նշեց. «Մենք՝ «Հոգևոր Հայաստան»-ով պատրաստել ենք մեր ողջույնը և ստորագրահավաք ենք կազմակերպել, արդեն բավականին մարդիկ միացել են: Մենք ողջունում ենք և հայտնում ենք մեր միասնականությունը՝ բարձրացված խնդիրների առումով, և նաև մեր պատաստակամությունն ենք հայտնում միասնական ուժերով ինչ-որ բաներ անելու:
Ինձ շատ է դուր գալիս, որ ամբողջ հայկական աշարհում վերադասավորումներ են գնում՝ թե՛ իշխանության մեջ, թե՛ ընդհանրապես քաղաքական դաշտում, և այս վերադասավորումները մեզ անպայման մի քայլ առաջ են տանելու: Նաև համոզված եմ, որ մի քայլ առաջը շատ քիչ է, բայց ինչ արած, ամեն ինչ պետք է անենք, որ անընդհատ առաջ շարժվելու պրոցեսի մեջ լինենք»:
Անդրադառնալով հարցերին, թե որքանով է հավանական, որ հայկական ֆորումի գաղափարը կյանքի կկոչվի, և արդյո՞ք այս բոլոր նախաձեռնությունները միտված են հայկական ֆորումը կյանքի կոչելուն, Ե. Պետրոսյանը պատասխանեց. «Այո՛: Չնայած թվում է, թե բոլորը լոկալ կազմակերպված միջոցառումներ են, բայց ընդհանուր առմամբ կարծես թե ազգի կողմից պատվեր է իջեցված, որպեսզի այդ ֆորումը կայանա»:
Մանրամասները՝ տեսանյութում:
