Նոր կառավարության ձևավորումը արտաքին քաղաքական վերանայումների առջև է կանգնեցրել: Թեմայի շուրջ «Առաջին լրատվական»-ի հետ զրույցում ՄԱՀՀԻ-ի ասոցացված փորձագետ, քաղաքագետ Գևորգ Մելիքյանը նշեց, որ ՀՀ արտաքին քաղաքականության օրակարգը վերանայելու ջատագովներից է: Նրա խոսքով՝ այս ոլորտում ոչ միայն բացթողումներ կան, այլ նաև շատ հաճախ հաշվի չեն առնվում իրական մարտահրավերները. «Շեշտադրումները պարբերաբար փոխվում են, բայց տեսլականների մասով խնդիրներ ունենք»:
«Եթե հայ ժողովուրդը հանդես է գալիս որպես համամարդկային նշանակության ազգ, ապա Հայաստանի արտաքին քաղաքականությունը պետք է համապատասխանի դրան՝ գոնե տեսլականի առումով: Օրինակ՝ հրեաները այլ կերպ են նայում այդ հարցին: Նկատի չունեմ, որ մենք միֆերով առաջնորդվենք, բայց գոնե պետք է ունենալ մաքսիմալ և մինիմալ պլաններ, հեռահար և կարճաժամկետ ծրագրեր: Ըստ իս, մենք ավելի շատ իրադարձային ենք, անընդհատ կենտրոնանում ենք իրադարձություների վրա: Անհասկանալի են մեր նպատակները, թե ուր ենք գնում: Հստակություն, որոշակիություն պետք է լինի»,- նշեց Գ. Մելիքյանը:
Քաղաքագետը, անդրադառնալով կառավարության փոփոխություններին, նշեց, որ արտաքին քաղաքականության և պաշտպանության ոլորտներն ամենաբարդ ոլորտներն են, և նշեց. «Վստահ եմ, որ այդ պաշտոններում նշանակումների ուղղությամբ բանակցություններ են ընթանում, ընդ որում՝ ոչ միայն Հայաստանում: Որքան էլ հակված չեմ Կարեն Կարապետյանի նշանակումը ուղղակիորեն կապել միայն Մոսկվայի հետ, այնուամենայնիվ նա չի էլ թաքցնում, նշում է, որ շատ հարցերում հաշվի է նստում ռազմավարական գործընկերոջ հետ:
Տարիներ շարունակ մեզ սովորեցրել են, որ Ռուսաստանը բնական ընտրություն է. բնական, բայց ոչ բանական, մենք պետք է կարողանանք այդ տարբերությունը դնել և, բացի իներցիոն քաղաքականությունից, ռացիոնալ քաղաքականություն վարել, վերաիմաստավորել հարաբերությունները և դրանք դարձնել չափելի, հասկանալ, թե հարաբերություններն ինչ են տալիս Հայաստանին: Կարևորն այն է, որ Հայաստանը հասկանա, թե ուր է ուզում գնալ»:
Այն, որ այս երկու գերատեսչությունների՝ ԱԳՆ և ՊՆ ղեկավարները դեռ չեն նշանակվել, ըստ Գ. Մելիքյանի, նշանակում է, որ այնքան էլ չեն ուզում, որ Կարեն Կարապետյանը խառնվի այդ գերատեսչությունների աշխատանքին:
Մանրամասները՝ տեսանյութում:
