ՀՀ Ֆինանսների նախարար Վարդան Արամյանն այսօր լրագրողների հետ զրույցում անդրադարձավ ՀՀ արտաքին պարտքի վերաբերյալ հարցերին. «Պարտքի քաղաքականությունը ամբողջ աշխարհում կա: Նորմալ է, որ 2014թ. դրամավարկային քաղաքականությունը կոշտացումների գնաց, որովհետև կային անհարկի սպասումներ փոխարժեքի մասով: Ամեն դեպքում դրա արդյունքում պարտքի միջոցով պետք է լրացուցիչ շունչ հաղորդվեր տնտեսությանը, հակառակ դեպքում տնտեսական աճի ցուցանիշները կլինեին ոչ թե 3 կամ 2,4, ինչն ակնկալում ենք այս տարի, այլ ավելի ցածր»:
Անդրադառնալով դիտարկմանը, ՀՀ պարտքն ավելացել է, բայց տնտեսությունը ծանր վիճակում է՝ նորանշանակ նախարարը նշեց. ««Չափազանց ծանր», «շատ աղետալի» ձևակերպումները պետք է միշտ հարաբերության մեջ դիտել: Վարչապետի ազդակը նորմալ է: Բայց երբ որ ասվում է՝ մենք մեր նպատակին չեն հասել, որովհետև պարտք ենք, այդ ձևակերպման հետ համամաձայն չեմ: Ամեն դեպքում մենք ունենք սահմանափակում: Իհարկե եթե մենք պարտքն ավելացնենինք շատ ավելի կտրուկ, դա հաջորդ տարի տնտեսական աճ կստեղծեր, բայց մենք միշտ հետամուտ ենք եղել, որպեսզի պարտքի գերաճ չլինի: Այսինքն՝ չընկնեինք Արգենտինայի օրը, որ մեկ-երկու տարվա ընթացքում 20-30 տոկոսով աճեցրել է իր պարտքը և վերջում հանգել կոլապսի: Մենք գնացել ենք ավելի համեստ տարբերակով: Մյուս տարի ավելի պահպանողական կլինենք:
Ամբողջ աշխարհում կա միջազգային փորձ: Պարտքի ճգնաժամ ունեցել են այն երկրները, որոնց ՀՆԱ ցուցանիշը եղել է 38,5 տոկոս, դա Ռուսաստանն է եղել 1998-ին, և նմանատիպ ձևաով պարտքի ճգնաժամ ունեցել է Արգենտինան, որի ՀՆԱ-ն եղել է 42 տոկոս: Հարց է առաջանում. ո՞րն է այն պարտքի մակարդակը, որը վտանգավոր է. ՀՀ-ն, կարծում եմ, ամեն դեպքում բարձիկ ունի պարտքի համար: Դա այդքան վտանգավոր չէ: Խնդիրն այն է, թե ապագա հոսքերն ինչպես են կայունացվելու: Այդ մասին կզեկուցեմ»:
Մանրամասները՝ տեսանյութում:
