Վերջին օրերին լրատվամիջոցների գլխավոր քննարկման թեման ԱՄՆ-ի առաջիկա ընտրություններում առաջադրված թեկնածուների՝ Դեմոկրատական կուսակցությունից Հիլարի Քլինթոնի և Հանրապետական կուսակցությունից Դոնալդ Թրամփի միջև հեռուստաբանավեճն է, որը նույնիսկ ռեկորդ սահմանեց դիտողների թվաքանակով՝ ավելի քան 80 մլն մարդ էր դիտել այդ պահին հեռուսաբանավեճը: Թեմայի շուրջ «Առաջին լրատվական»- ը զրուցել է ԱՄՆ TUFTS համալսարանի գիտաշխատող Սուրեն Սարգսյանի հետ:
Ինչո՞վ են մեզ՝ հայաստանցիներիս համար կարևոր այս ընտրությունները, այս հեռուստաբանավեճերը. անդրադառնալով այս հարցին՝ Սուրեն Սարգսյանը նշեց. «Ընդհանրապես երկու թեկնածուները ծայրահեղ տարբեր են նաև մեզ համար: Հիլարի Քլինթոնը փայլուն պատկերցում ունի մեր տարածաշրջանի մասին, երկու անգամ եղել է Երևանում, երբ ԱՄՆ պետքարտուղար էր, փայլուն պատկերացումներ ունի հայ-թուրքական հարաբերությունների մասին, որովհետև անմիջական ներգրավվածություն է ունեցել: Ի դեպ, կարծում եմ, որ նրա ընտրվելու դեպքում այս հարցը ինչ-որ կերպ բերվելու է արտաքին քաղաքական օրակարգ, որովհետև նա կնքահայրերից մեկն է եղել այս գործընթացի՝ Օբամայի ադմինիստրացիայի ժամանակ»:
Նա շատ լավ պատկերացնում է, թե հայ-թուրքական և ղարաբաղյան գործընթացներն ինչաքանով են կապված և դրանք ինչպես կարող են անջատվել, որովհետև ԱՄՆ-ը նույնպես կողմնակից է եղել այդ հարցերի տարանջատված քննարկմանը և առաջմղմանը: Անդրադառնալով այս դիտարկմանը՝ Ս. Սարգսյանը նշեց, որ Քլինթոնը նաև փայլուն պատկերացում ունի ԼՂՀ բանակցությունների վերաբերյալ, որովհետև Մինսկի խմբի համանախագահ երկրի պետքարտուղար է եղել. «Սա նշանակում է, որ բոլոր գործընթացներն իր ձեռքի տակով անցել են, այսինքն՝ տարածաշրջանային խնդիրները փայլուն պատկերացնում է՝ ի տարբերություն Թրամփի, ով բացարձակ տեղյակ չէ մեր տարածաշրջանի մասին: Ես անձամբ հարցրել եմ նրան ԼՂ-ի մասին, նա բացարձակ տեղյակ չէր, այդ ժամանակ դեռ նախագահի թեկնածու չէր, միգուցե հիմա ավելի պատրաստ է, քան այն ժամանակ, համենայնդեպս քաղաքական գործիչ, ով տեղյակ չէ համաշխարհային կոնֆլիկտներից, խնդիրներից, իհարկե դա վտանգավոր է»:
Ս. Սարգսյանի հավաստմամբ՝ մեծ թվով հայ հանրապետականներ, ովքեր ապրում են Մասաչուսեթսում, ընտրելու են Թրամփին. «Նախ՝ նրանք հանրապետական են դրա համար, երկրորդ՝ ասում են, որ հոգնել են դեմոկրատներից, երրորդ՝ նրա համար, որ Թրամփը մուսուլմանների ներհոսքը դեպի ԱՄՆ կանխելու ծրագիր է ներկայացրել»:
«Սովորոաբար հայերը դեմոկրատներին սատարողն են եղել,- նշեց Ս. Սարգսյանը և հավելեց, որ այս անգամ թեկնածուներից ոչ մեկը հայկական համայնքին չի դիմել, և հայ համայնքը պասիվ դեր է ստանձնել:
Ս. Սարգսյանի կարծիքով՝ Քլինթոնի ընտրվելու դեպքում նա ցանկացած պարագայում բանակցելու է Ռուսաստանի հետ, աջակցելու է հայ-թուրքական հարաբերությունների հաստատմանը, որովհետև դա իր ծրագիրն է եղել, որը մեծ հաշվով տապալվել է թուրքական կողմի պատճառով. «Եվ դա բոլորն են գիտակցում, նույնիսկ ամերիկյան կողմը բազմիցս առիթ ունեցել է հայտարարելու, որ չպետք է Ղարաբաղյան խնդիրը կապել Թուրքիայի խնդրի հետ: Ես կարծում եմ, որ Քլինթոնի վերընտրվելու դեպքում հայերը նորից հայտնվելու են համաշխարհային գործընթացների մեջ՝ հայ-թուրքական հարաբերությունների մասով, մանավանդ, որ այսօրվա Թուրքիան այն ժաանակվա Թուրքիան չէ, և Էրդողանի դիրքերը այնքան էլ ուժեղ չեն»:
Մանրամասները՝ տեսանյութում:
