Օրերս Ադրբեջանում կայացավ սահմանադրական փոփոխությունների հանրաքվեն, ակնհայտ դարձավ, որ Ադրբեջանը վերջնականապես գնում է խանություն դառնալու ճանապարհով: Այդ փոփոխություններով նախագահի պաշտոնավարման 5-ամյա ժամկետը երկարաձգվում է, դառնում է 7-ամյա, վերացվում է նվազագայուն տարիքային շեմը. 19-ամյա որևէ պատանի կարող է դառնալ Ադրբեջանի նախագահ: Փորձագետների մեծ մասը նշում են, որ այս փոփոխություններն արված են մեկ նպատակով, որ Ի. Ալիևը պաշտոնավարի առաջիկա 7 տարիներին, որից հետո իր գահը բարեհաջող փոխանցի իր որդուն, որն այդ ժամանակ կդառնա 26 տարեկան: Թեմայի շուրջ «Առաջին լրատվական»- ը զրուցեց «Մոդուս վիվենդի» կենտրոնի ղեկավար, պատմաբան, դիվանագետ Արա Պապյանի հետ:
Ա. Պապյանի դիտարկմամբ՝ ըստ էության, Ալիևը նույն Ալիևն է, Իլհամը դեռ պետք կառավարի, պարզապես նա լուծում է ժառանգության հարցը: «Մտցվում է փոխնախագահի պաշտոն, և նախագահի մահվան, հիվանդության կամ հրաժարականի դեպքում իշիանությունը փոխանցվում է նրան: Եվ քանի որ տարիքային սահմանափակումը հանված է, 19-ամյա Հեյդար Ալիևը եթե առաջիկայում ստանձնի փոխնախագահի պաշտոնը, իրավական տեսակետից ժառանգությունը կապահովվի»:
Արա Պապյանի խոսքով՝ եթե կային մարդիկ, խմբավորումներ, որոնք հույս ունեին, որ կկարողանան գալ իշխանության Ի. Ալիևից հետո, պետք է այս հույսից հրաժարվեն: Անգամ մահափորձի պարագայում միևնույն է իշխանությունը կմնա Ալիևներին: «Իլհամ Ալիևը հստակ քաղաքականություն կվարի՝ ինքը և իր որդին միաժամանակ նույն վայրում չեն երևա: Ըստ էության՝ սա զուտ ընտանեկան բիզնեսի ձև է, Ադրբեջանը դառնում է փակ բաժնետիրական ընկերություն. այս փոփոխությունները Ադրբեջանում տեղի են ունենում սահմանադրական, օրինական ճանապարհով:
Ա. Պապյանն անդրադարձավ նաև Հայաստանի ներքաղաքական կյանքում տեղի ունեցող իրադարձություններին՝ մասնավորապես կառավարության փոփոխություններին, նախարարների պաշտոնանկություններին և նոր նշանակումներին: Անդրադառնալով դիտարկմանը, որ դեռևս որոշված չէ՝ ԱԳ նախարարը և պաշտպանության նախարարը կվերանշանակվեն, թե ոչ, Ա. Պապյանը կարծիք հայտնեց, որ Էդվարդ Նալբանդյանի թիկունքում Ռուսաստանն է և թուլ չտվեց, որ նրան ազատեն ԱԳ նախարարի պաշտոնից:
Իսկ պաշտպանության նախարարի պաշտոնը, ըստ Ա. Պապյանի, պետք է տալ կնոջ:
Մանրամասները՝ տեսանյութում: