Այս շաբաթվա ընթացքում ամբողջական կառավարություն կունենանք, կլինեն ոչ թե նախարարների պաշտոնակատարներ, այլ նախարարներ: Այս մասին այսօր լրագրողների հետ զրույցում հայտարարեց ԱԺ փոխնախագահ, ՀՀԿ խոսնակ Էդուարդ Շարմազանովը՝ հավելելով, որ նշանակման ժամկետները չեն խախտվել. «Խախտում չի եղել, ուստի դանդաղ շտապեք: Պարոն նախագահի լիազորությունների շրջանակում է Պաշտպանության և Արտաքին գործերի նախարարների նշանակումը, և պարոն նախագահը, օգտնվելով իր սահմանադրական իրավունքից, համոզված եմ՝ ժամկետներում կտեղավորվի»:
Հարցին՝ կցանկանա՞ Սեյրան Օհանյանին տեսնել ՊՆ-ում, Է. Շարմազանովը պատասխանեց, որ ցանկությունը քաղաքական կատեգորիա չէ. «Ես Սեյրան Օհանյանին էլ, Էդվարդ Նալբանդյանին էլ շատ դրական եմ գնահատում, ինչպես նաև Տիգրան Սարգսյանին ու Հովիկ Աբրահամյանին»,-ասաց Շարմազանովը: Հիշեցմանը, որ Սեյրան Օհանյանն ասել էր, որ ՀԱՊԿ գլխավոր քարտուղարի առաջարկ լինելու դեպքում կմերժի, արդյոք այն ցանկությա՞մբ է, թե՞ նշանակվելով, նա ասաց. «Սեյրան Օհանյանը կուսակցական չէ, ես չգիտեմ՝ առաջարկ եղել է, թե ոչ»:
Շարմազանովը չի կարծում, որ նոր կառավարության ձևավորումը հնի ու նորի միջև պայքար է: «Բոլոր այն մեր քաղաքացիները, որոնք կարծում էին, թե Հայաստանում նոր կառավարությունը հնի շարունակողը չէ և նոր կառավարության քաղաքական պատասխանատուն այլ է, սխալվում են։ Սա բարեփոխում է, սեպտեմբերյան բարեփոխում… Բոլոր վարչապետների, այդ թվում Կարեն Կարապետյանի կառավարության քաղաքական պատասխանատուն ՀՀԿ-ն է, մենք պատասխանատու ենք թե՛ դրականի, թե՛ բացասականի համար»,- ընդգծեց Է. Շարմազանովը:
Մանրամասները՝ տեսանյութում: