«Քաղաքացիական պայմանագիր» կուսակցության վարչության անդամ, ԱԺ պատգամավոր Նիկոլ Փաշինյանի կարծիքով՝ Գյումրիում և Վանաձորում իրենք անցկացնում են շատ հաջող քարոզարշավ, քանի որ մարդիկ բակային հանդիպումներում շատ անկեղծ են. «Մենք շատ բաց, պարզ բոլոր հարցերը քննարկում ենք և չունենք արարողակարգային, կեղծ ձևերի կարիք»:
Այնուամենայնիվ, Նիկոլ Փաշինյանը անկանխատեսելի է համարում ընտրությունների ելքը: «Թե ինչ կորոշի ընտրողը՝ դա գիտի միայն ընտրողն ինքը, բայց մենք հույս ունենք, որ նրա որոշումը կլինի մեր պատկերացումներին համապատասխան»,- ասաց նա՝ հավելելով. որ ընդհանրապես Հայաստանում կուսակցությունների ինստիտուտը վարկաբեկված է:
Այնուամենայնիվ, Փաշինյանը համարում է, որ անհատների, օրինակ՝ ՔՊ-ից Վանաձորի քաղաքապետի թեկնածու Արամ Խաչատրյանի գործունեության նկատմամբ կա մեծ հարգանք և վստահություն, իսկ թե արդյոք հնարավոր կլինի՞ այդ վստահությունը վերակերպել մեր քաղաքական կուսակցության նկատմամբ վստահության՝ «այ, հիմա մեր ամենամեծ խնդիրը դա է»:
Հարցին՝ Վանաձորում ընդդիմությանը չստացվեց մեկ թեկնածուով հանդես գալ, դրանից չի՞ շահի արդյոք Հանրապետական կուսակցությունը, Նիկոլ Փաշինյանը պատասխանեց. «Ես շփումներից այնպիսի տպավորություն ունեմ, որ Հանրապետական կուսակցությունը ընդհանրապես դուրս է այս պրոցեսից: Նրանք և՛ Գյումրիում, և՛ Վանաձորում կիրառել են նույն մոդելը՝ մաքսիմալ քողարկել, որ գործ ունեն ՀՀԿ-ի հետ, որովհետև մարդիկ այդ կուսակցության անունը լսել ուղղակի չեն ուզում»:
