Այսօր Ազգային ժողովում լրագողների հետ զրույցում սյունեցի ՀՀԿ-ական պատգամավոր Արմեն Կարապետյանը անդրադարձավ Սյունիքի մարզպետ Սուրիկ Խաչատրյանի պաշտոնանկության մասին շրջանառվող լուրերին:
–Արդեն իսկ մամուլն անդրադարձել է, որ Կառավարությունում իրականացվող պաշտոնանկությունների, կադրային փոփոխությունների շրջանակում առաջիկայում հերթը Սյունիքի մարզպետին է հասնելու. մարզպետներին փոխելու վերաբերյալ ի՞նչ կարծիք ունեք:
-Մամուլով չի որոշվում մարզպետի հետագա աշխատանքը, կառավարությունը նոր է ձևավորվում, և կառավարության ղեկավարը կորոշի: Մարզպետն ինքն էլ է հայտարարել, որ վարչապետը կարող է որոշել՝ ինքը հետագայում կաշխատի, թե ոչ:
–Մինչ այդ Սուրիկ Խաչատրյանը լրագրողների հետ զրույցում ասաց, որ հերթն իրեն չի հասնի, այսինքն՝ խաղի կանոննե՞ր են փոխվել:
-Այդպիսի բան չեմ լսել, դուք նորություն եք ասում:
-Իսկ դուք կաշխատեի՞ք Սյունիքի մարզպետ:
-Գիտեք՝ մարզպետ աշխատելու համար պետք չէ գայթակղվել: Մարզպետի աշխատանքը շատ ծանր ու պատասխանատու աշխատանք է՝ հատկապես նոր կառավարությունում: Այնպես չէ, որ կարող ես պարտականությունները չկատարել, միայն օգտվես իրավունքներից: Մարզպետի աշխատանքը ցուցանիշ է, որը պետք է ապահովես, այնպես որ ես գայթակղված չեմ և ոչ մեկին խորհուրդ չեմ տա՝ ճանաչելով Կարեն Կարապետյանին, նա շատ խստապահանջ է, պետք է աշխատես պատշաճ մակարդակով:
-Այսինքն՝ Հովիկ Աբրահամյանի ժամանակ կարելի էր աշխատել այլ կերպ:
-Նույնն էր Հովիկ Աբրահամյանի ժամանակ, բայց կարծես թե կատարվում են համակարգային փոփոխություններ, նոր ձևով պետք է մոտենանք, տնտեսության վիճակը շատ ծանր է: Պետք է շարքային քաղաքացին իր վրա զգա այս փոփոխությունները: Հիմա ամեն ինչ արվում է կառավարության կողմից, որ քաղաքացիները զգան այդ փոփոխությունները: Ես այդքան էլ հակված չեմ մադկանց փոփոխությանը, ավելի շատ կարևոր է համակարգային փոփոխությունը ոչ թե անուն-ազգանուններ փոխելը:
–Պարոն Կարապետյան, կարո՞ղ ենք արձանագրել, որ մինչև հիմա ամենաթողություն է եղել Սյունիքի մարզում, և մամուլի ուշադրության կենտրոնում է եղել հենց Սյունիքի մարզպետը, և այս բոլոր հանգամանքները հաշվի առնելով պետք է Կարեն Կարապետյանը գնա այդ փոփոխությանը:
-Չէի ասի, որ առանձնահատուկ է Սյունիքի մարզը, ինչ որ Սյունիքի մարզում կա, նույնն էլ մյուս մարզերում է, ես լուրջ տարբերություն չեմ տեսել: Կարելի է ասել, որ այդ փոփոխությունները բոլոր մարզերին է վերաբերում:
-Բայց Ս. Խաչատրյանը, նրա ընտանիքի անդամները անընդհատ մամուլի ուշադրության կենտրոնում էին:
-Ես ո՛չ դատախազ եմ, ո՛չ էլ դատավոր, չէի ցանկանա, որ ինձ նմանատիպ հարցեր տայիք:
Մանրամասները՝ տեսանյութում: