2011թ. առաջին եռամսյակում Nokia ընկերությունը շարունակել է կորցնել իր դիրքերը բջջային հեռախոսների շուկայում: Մեկ տարվա կտրվածքով, ի տարբերություն նախորդ տարվա ցուցանիշների, Nokia-ն կորցրել է 18%: Հիմա Nokia-ն զբաղեցնում է այդ շուկայի 25%-ը: Այս մասին հաղորդում է Gartner վերլուծական ընկերությունը:
Ցուցակում երկրորդ և երրորդ տեղերը զբաղեցնում են Samsung և LG ընկերությունները, որոնց դիրքերը նույնպես թուլացել են՝ 2-ական %-ով: Հիմա Samsung-ն ունի 16.1%, իսկ LG-ն՝ 5.6%:
Ընդհանուր առմամբ հունվար-մարտ ամիսներին աշխարհում վաճառվել է 427.8 միլիոն նոր բջջային հեռախոս: Նախորդ տարվա նույն ժամանակահատվածում վաճառվել է 359.6 միլիոն, ինչը 19%-ով պակաս է, քան այս տարի: Սակայն առաջատարներից 4-ը՝ Nokia-ն, LG-ն, Motorola-ն և Sony Ericsson-ը ավելի քիչ հեռախոսներ են վաճառել, քան մեկ տարի առաջ:
Ինչպես և սպասվում էր, ամենամեծ աճն արձանագրել է Apple-ը, որին հաջողվել է կրկնապատկել iPhone-ների վաճառքը՝ 8.3-ից մինչև 16.9 միլիոն միավոր: Apple-ը բջջային հեռախոսների շուկայում զբաղեցնում է 4-րդ տեղը՝ 3.9%-ով:
Ինչ վերաբերում է Gartner-ի կողմից սմարթֆոնների շուկայի ուսումնասիրությանը, ապա հունվար-մարտ ամիսներին աշխարհում ընդհանուր առմամբ վաճառվել է 100 միլիոն սմարթֆոն՝ նախորդ տարվա նույն ժամանակահատվածի 85 միլիոն սմարթֆոնի փոխարեն: Ամենատարածված օպերացիոն համակարգերն են Android-ը (36%), Symbian-ը (27.4%), iOS (16.8%) և BlackBerry-ն (12.9%):