ՀՀ բնապահպանության նախկին նախարար Կարինե Դանիելյանը «Առաջին լրատվական»-ի հետ զրույցում բնապահպանության նախարարի պաշտոնում Արծվիկ Մինասյանի նշանակումը համարեց կառավարության կողմից «շատ օրիգինալ լուծում»:
Կարինե Դանիելյանի խոսքով՝ Արծվիկ Մինասյանին ինքը միշտ ընկալել է որպես լայնախոհ տնտեսագետ: Մեր զրուցակիցը նկատեց, որ այս հարցում հնարավոր են մի քանի սցենարներ. «Նախ, հավանաբար, էկոլոգիան լրիվ կենթարկվի էկոնոմիկային, այսինքն՝ այլևս որևէ անհամաձայնություն չի լինի, այլ կլինեն լուծումներ միայն հօգուտ տնտեսության, ինչն ինձ համար անընդունելի է»:
Ինչպես նշեց տիկին Դանիելյանը՝ երկրորդ տարբերակն այն է, որ պարոն Մինասյանը, տիրապետելով տնտեսության ամբողջ համակարգին, կկարողանա տեսնել ամենախոցելի տեղերը, և կգտնվեն տնտեսության և էկոլոգիայի կոմպրոմիսային տարբերակներ, «ոչ թե մշտական կոնֆլիկտ, որը միշտ ի վնաս էկոլոգիայի է լուծվում»:
Կարինե Դանիելյանը ներկայացնելով տարածված կարծիքը՝ ասաց, որ այս նշանակմամբ կարծես երկրորդային մոտեցում է ցուցաբերվում էկոլոգիայի նկատմամբ, այսինքն՝ բացարձակ պարտադիր չէ, որ այնտեղ աշխատի մասնագետը. «Մինչդեռ դա լուրջ գիտություն է»:
Այնուամենայնիվ, տիկին Դանիելյանը հույս հայտնեց, որ պարոն Մինասյանը կկարողանա էկոնոմիկա-էկոլոգիա սիմբիոզը գտնել: