«Նորանշանակ վարչապետը մատնանշել է նույն խնդիրները, ինչ նախորդ երկու վարչապետները»,- այսօր հրավիրված մամլո ասուլիսին ասաց «Ազատ դեմոկրատներ» կուսակցության փոխնախագահ Անուշ Սեդրակյանը,- Եթե վերցնենք Հայաստանի նախկին երկու վարչապետների ելույթները՝ երկրում տիրող իրավիճակի վերաբերյալ, ապա դրանք, ասես, մեկը մյուսի կրկնությունը լինեն: Տեսնում եմ պատմության կրկնություն, որտեղ անընդհատ խոսվում է մեր տնտեսական վատթար վիճակի մասին: Բայց զավեշտալի է, որ ՀՀԿ ներկայացուցիչները տարբեր ատյաններով մեզ ասում են, որ մեր տնտեսությունը լավացել է, որը պետական բարձր մակարդակով, չգիտես ինչու, հաստատում է ՌԴ նախագահ Վլադիմիր Պուտինը, դրանից օրեր անց մենք իմանում ենք, որ Հայաստանում տեղի է ունեցել տնտեսական աճի նվազում և հիմա դարձյալ մեզ պետք են տնտեսական ռեֆորմներ: Ես կարծում եմ, որ սա արատավոր շրջանակ է, որը քայքայում է ՀՀ տնտեսական կառուցվածքը»:
Ասուլիսի մյուս բանախոսը՝ ՀՀԿ խմբակցության քարտուղար Գագիկ Մելիքյանը նշեց, որ մեր երկրում տեղի ունեցող փոփոխությունները կատարվում են, որպեսզի առավել արդյունավետ տնտեսություն ունենանք: Գ. Մելիքյանը նաև տեղեկացրեց, որ ՀՀԿ խմբակցությունն այսօր ԱԺ-ում առաջարկել է Սփյուռքի նախարարությունը վերանվանել Սփյուռքի և հայրենադարձության նախարարություն:
Անուշ Սեդրակյանը, ի պատասխան այս տեղեկության, նշեց, որ քանի դեռ կոռուպցիայի դեմ պայքարը զուտ անձերի տեղափոխման, տեղաբաշխման կամ նախարարությունների վերանվանման ուղով է ընթանում, այլ ոչ թե փոխում իր բնույթը, ուզում ես՝ հազար անգամ անուն փոխիր, դրանից ոչինչ չի փոխվելու մեր երկրում:
Մանրամասները՝ տեսանյութում: