ՄԱԿ-ի Մանկական հիմնադրամի հայաստանյան գրասենյակի երեխաների իրավունքների մոնիթորինգի բաժնի ղեկավար Լուսինե Երեմյանը «Առաջին լրատվական»- ի հետ զրույցում նշեց, որ այսօր հրավիրված մամլո ասուլիսում ներկայացվել է մանկական աղքատությունը Հայաստանում. բազմակի և համընկնող խոցելիության վերլուծությունը, որը, նրա խոսքով, բեկումնային հետազոտություն է լինելու:
«Այս վերլուծության վրա աշխատել ենք շուրջ մեկ տարի՝ ԱՎԾ -ի հետ սերտ համագործակցությամբ: ԱՎԾ տվյալների համաձայն՝ ամեն երեք երեխաներից մեկը թե՛ աղքատ է, թե՛ խոցելի, Մանկական բազմաչափ աղքատության սույն հետազոտության արդյունքում արձանագրվել է, որ Հայաստանում ամեն երկրորդ երեխան է խոցելի. սա մտածելու լուրջ տեղիք է տալիս, սոցիալական քաղաքականությունը պետք է ուղղորդել այս երեխաների խնդիրների ուղղությամբ:
6-14 տարեկան երեխաների գրեթե կեսը սոցիալական փոխհարաբերությունների առումով են խոցելի: Իսկ 15-17 տարեկան երեխաները խոցելի են ժամանցի կազմակերպման առումով. պետական քաղաքականության քննարկման հարթությունից կարծես թե այդ երեխաների ժամանցի խնդիրը դուրս է մնացել:
Հայաստանում երեխաների մեկ երորդը խոցելի է, բայց ոչ աղքատ: Գյուղաբնակ երեխաների 82 տոկոսն է խոցելի, քաղաքաբնակների 53 տոկոսը:
Այս հետազոտության մեթոդաբանությունը յուրահատուկ է, այն իր մեջ ներառում է հետևյալ առանցքային կետերը. հիմնված է Երեխաների իրավունքների պաշտանության կոնվենցիայի վրա, այս հետազոտության շրջանակներում կարևոր ենք համարել կենսափուլը, այն, որ ցանկացած երեխա տարբեր տարիքում ունի ուրույն կարիքներ»,- նշեց Լուսինե Երեմյանը:
Մանրամասները՝ տեսանյութում:
