Ազգային ժողովի դիմաց Սարի թաղի մի խումբ բնակիչներ բողոքի ակցիա են իրականացնում, նրանք այնտեղ են եկել «Ազատ արձակեք մեր տղաներին», «Վերջ տվեք անօրինականությանը» գրությամբ պաստառներով: «Սասնա ծռերի» կողմից ՊՊԾ գնդի գրավումից հետո՝ հուլիսի 19-ին Սարի թաղում տեղի ունեցած բախումների հետևանքով բանտախցերում հայտնված երիտասարդների ընտանիքները պահանջում են համաներում կիրառել իրենց հարազատների նկատմամբ:
Բողոքի ակցիայի մասնակիցները նշում են, որ իրենց հարազատների կալանավորումն անօրինական է և հավաստիացնում են, որ նրանք այդ օրը ոչ թե ի պաշտպանություն «Սասնա ծռերի» էին հանդես գալիս, այլ դուրս էին եկել կենցաղային հարցեր՝ գազի, էլեկտրաէներգիայի և տրանսպորտի հարցը լուծելու պահանջով:
«Կան տեսանյութեր, նայեք, կտեսնեք… Այնպես չի եղել, որ ոստիկանները ձեռքները ծալած նստել են, չէ, զենք են հանել, մարդիկ հարցրել են՝ մեզ ե՞ք խփելու, ասել են՝ քո գործը չի, լրագրողներին են ծեծել, ջնջել են տվել նկարածը: Մարդը կարա վախից քար գցի, տեսնում են՝ զենք կա, քար են գցում: Բայց էդ ի՞նչ հանցանք ա…»,- ասաց կալանավորվածներից մեկի եղբայրը:
«Ես հիվանդանոցում ծանր պառկած եմ եղել, երեխաներս չեն կարողացել երեք օր մոտս գան, որովհետև ճանապարհը փակ է եղել: Բա մարդիկ պահանջել են, որ բացեն, գազը, լույսը միացնեն… Սա է եղել, քաղաքականության հետ կապ չեն ունեցել»,- ասաց ծնողներից մյուսը:
«Կռվի մեջ գաթա, հալվա չեն բաժանում, կռվ է, ստացվել է, վիրավորանքները փոխադարձ են եղել, ամեն մեկն իր շահն է պաշտպանել»,- ներկայացրեց ծնողներից մեկը և դժգոհեց. «Ոստիկանը մարդու աչք հանեց, ընդամենը աշխատանքից հեռացրին, պատասխանատվության չենթարկեցին, իսկ մի ապտակի համար 5-10 տարի ե՞ն տալիս»:
Սարի թաղի բնակիչները նշում են, որ եթե իրենց հարազատներն ազատ չարձակվեն, ամբողջ սարի թաղն է ոտքի կանգնելու և պայքարելու է մինչև վերջ:
Մանրամասները՝ տեսանյութում: