Նավթի համաշխարհային գները բարձրանում են հաջորդ շաբաթ նավթ արդյունահանող երկրների հանդիպման վերաբերյալ Ալժիրի էներգետիկայի նախարար Նուրեդին Բուտերֆայի դրական հայտարարությունների շնորհիվ։ Այս մասին հայտնում է RIA Novosti-ն՝ հղում անելով բորսային տվյալներին։
Այսօր առավոտյան Brent մակնիշի հյուսիսծովան նավթային խառնուրդի դեկտեմբերյան ֆյուչերսների արժեքը աճել է 0.73 տոկոսով՝ հասնելով մեկ բարելի դիմաց 46.82 դոլարի։ WTI թեթև նավթի նոյեմբերյան ֆյուչերսների արժեքը բարձրացել է 0.74 տոկոսով՝ հասնելով 44.81 դոլարի։
Կիրակի ալժիրցի նախարարը հայտարարել էր, որ երկիրը ՕՊԵԿ-ի առաջիկա հանդիպմանը ակնկալում է նավթ արտադրող երկրների կողմից արդյունահանման մակարդակի սառեցման կամ նվազեցման մասին որոշման ընդունում։ Նախարարի խոսքով՝ Սաուդյան Արաբիան առաջարկել է իր արտադրությունը նվազեցնել օրական 500 հազար բարելով, և հանդիպման մասնակիցնեը ծրագրում են քննարկել այդ նախաձեռնությունը։ Սաուդյան Արաբիան օրական արդյունահանում է 10 մլն բարել նավթ։