«Առաջին լրատվական»- ի զրուցակիցն է ՀՀ պաշտպանության նախկին նախարար Վաղարշակ Հարությունյանը:
-Պարոն Հարությունյան, անդրադառնանք Հայաստանում ռազմական շքերթից հետո բարձրացած աղմուկին. փորձագետները չեն հերքում , որ ցուցադրված զինատեսակները պատկանում են ՀՀ ԶՈւ-ին, բայց նշում են, որ սա կարող է լինել ընդամենը շոու, և անհրաժեշտության դեպքում Ռուսաստանը թույլ չի տա օգտագործել այդ զինատեսակները: Եվ նշվում է, որ «Իսկանդերի» մասնագետներ չունենք. ինչպե՞ս կմեկնաբանեք այս տեղեկությունները:
-Երբ այդպիսի կարծիք հայտնողները խոսում էին այն մասին, որ Ռուսաստանը չի տրամադրի այդ զինատեսակը, ես գաղտնիք բացեմ, այն ժամանակ արդեն այդ «Իսկանդերներն» այստեղ էին: Եվ մենք արդեն ունենք պատրաստված հայ մասնագետներ, նրանք ինքնուրույն գործում են: Մենք ունենք մարտունակ «Իսկանդերներ», որոնք այսօր պատրաստ են մարտական ծառայություն իրականացնելու:
-Ո՞ր դեքում Հայաստանը կօգտագործի դրանք: Ասացիք, որ դրանք վաղուց այստեղ էին, նույնիսկ ապրիլյան պատերազմի օրերին, երբ նշվում էր, որ Ադրբեջանը իր ռազմական առավելությամբ մի քանի անգամ գերազանցում է Հայաստանին:
-Բայց ո՞վ է ասել, որ գերազանցում է, չի գերազանցում, Ադրբեջանն ունի որոշ զինատեսակների քանակային առավելություն: 91-94թթ-ին ունեցել է ռազմական առավելություն: Բայց տեխնիկայի քանակը դա մեկ չափանիշ է: Մենք ունենք առավելություն այլ զինատեսակներում, մենք ունենք ՀՕՊ, որը դարձրել է զրո իրենց օդային ուժերի օգտագործումը, ունենք հրթիռային համակարգ: Ով խոսում է այն մասին, որ Ադրբեջանը մի քանի անգամ գերազանցում է իր ռազմական առավելությամբ, նա տեղյակ չէ, չի հասկանում՝ ինչ է ասում:
-Արծրուն Հովհաննիսյանն ասում է, որ «Միգ» օդային կործանիչները ռուսական ռազմաբազային են պատկանում, ոչ թե Հայաստանին:
-Այո՛, բայց ով դա չգիտի: Մեր առավելությունը հենց դրանում է, որ մենք փող չենք ծախսում, բայց ունենք այդ համակարգերը: Ադրբեջանը փող է ծախսել, ձեռք է բերել ինքնաթիռներ, բայց հիմա ի վիճակի չէ օգտագործել, որովհետև մենք ունենք հզոր հակաօդային պաշտպանություն ինչը նաև վերջերս հզորացրել ենք «Բուկ M» համակարգով:
-Հայաստանը ե՞րբ կկարողանա օգտագործել այդ զինատեսակները, ինչպիսի՞ ագրեսիայի դեպքում:
-Լայանածավալ պատերազմի դեքում:
-Կա՞ նման հավանականություն:
-Հիմա չեմ համարում, որ կա այդպիսի հավանականություն, բայց մենք պետք է միշտ պատրաստ լինենք: Մեր բանակի մարտունակությունը, մեր հասարակության բարձր ոգին և վստահությունը մեր ռազմաքաղաքականության ղեկավարության և մեր բանակի հանդեպ. դա է մեզանից պահանջվում:
Հարցազրույցն ամբողջությամբ՝ տեսանյութում:
