ԵՊՀ Քաղաքակրթական և մշակութային հետազոտությունների կենտրոնի փորձագետ, արաբագետ Հայկ Քոչարյանի համոզմամբ` Հայաստանը, Սիրիայում հումանիտար ճգնաժամի լուծմանն ուղղված ծրագրերին մասնակցելիս, պիտի համագործակցի ոչ միայն Ռուսաստանի, այլև մյուս առանցքային խաղացողների, մասնավորապես Միացյալ Նահանգների հետ:
Արաբագետն այսպիսի կարծիք հայտնեց «Առաջին լրատվական»-ի հետ զրույցում` մեկնաբանելով ՀՀ նախագահ Սերժ Սարգսյանի ելույթը Բիշկեկում: Խոսելով Սիրիայի հիմնախնդրի մասին՝ Սերժ Սարգսյանը ողջունել էր Ռուսաստանի ջանքերը՝ ուղղված Սիրիայում հումանիտար աղետի կանխարգելմանը, և նաև ավելացրել, որ հայկական կողմը քննարկում է Հայաստանի և Սիրիայում հայկական համայնքի ներգրավման հնարավորությունները այդ գործընթացներում:
«Սերժ Սարգսյանն ասում է, որ Հայաստանը ողջունում է Ռուսաստանի հումանիտար օգնությունը և ցանկություն է հայտնում, որ Հայաստանը և սիրիահայերը նաև ինչ-որ կերպ կմասնակցեն այդ հումանիտար ծրագրերի իրականացմանը: Եթե գործողությունները լավ ծրագրված և մտածված լինեն, և եթե սիրիական համայնքում կա ցանկություն՝ համակարգելու որոշակի աշխատանքներ, կարելի է լավ արդյունքների հասնել»,- մեկնաբանեց Հայկ Քոչարյանը՝ ավելացնելով, որ այդ աշխատանքներն իրականացնելը բավական բարդ գործ է, և անհրաժեշտ է գործողությունները համաձայնեցնել սիրիական հակամարտության կարգավորման մեկ այլ առանցքային խաղացողի՝ Միացյալ Նահանգների հետ:
«Միայն Ռուսաստանի հետ համագործակցելով՝ Հայաստանը կհայտնվի մի իրավիճակում, որ հակամարտության մեջ ներգրավված փոքր խաղացողը ինչ-որ մեկի կողմն է բռնում: Ցանկալի է, որ նման ծրագրերին մասնակցելիս հայկական կողմը համաձայնեցնի իր գործողությունները նաև մյուս խաղացողների հետ, հակառակ դեպքում դա կարող է վտանգել հայկական համայնքի դիրքերը Սիրիայում», – նշեց արաբագետը: