«Զորահանդեսի ամբողջ մեխը «Իսկանդերն» էր, ամբողջ շուուն կազմակերպվել էր «Իսկանդերները» ցուցադրելու համար»,- «Առաջին լրատվականի»-ի հետ զրույցում ասաց քաղաքագիտության դոկտոր Հայկ Մարտիրոսյանը: – Եթե մտածում ենք, որ դա խիստ անսպասելի էր դրսի համար և հատկապես Հայաստանի թշնամի պետության համար, ապա նրանք վստահ էին, որ Հայաստանն ունի, և սա իրենց գոնե ղեկավարության համար նորություն չէր: Մյուս կողմից՝ ինչպես Հայաստանում են գերագնահատում «Իսկանդերի» դերը, այնպես էլ Ադրբեջանում:
Հայաստանը ատոմային զենք չէ, որ ձեռք է բերել, Հայաստանը մեկ գիշերում չի դարձել Շվեյցարիա կամ Ավստրալիա. մնացել է նույն Հայաստանը. ընդամենը ունի շատ հզոր հրթիռային համակարգ: Նախ՝ մեծ հարց է, թե որքան հրթիռներ կան Հայաստանում պահեստավորված, երկրորդ՝ «Իսկանդերի» նշանակությունը հեռահարությունն է. սա ատոմային ռումբ չէ, որ ոչնչացնի մի ամբողջ քաղաք և մերձակա շրջաններ: Սա հզոր զենք է, բայց պետք է հասկանալ, որ սրանով Բաքուն ոչնչացնել երբեք չի հաջողվի:
Պետք է հասկանանք նաև, որ սա պատերազմի ժամանակ վերջին ռեսուրսն է. եթե ամեն ինչ կորսված լինի, և եթե Ադրբեջանն էլ ունենա այդ պահին, կօգտագործի իր ամենահզոր զենքը»:
Քաղաքագետի դիտարկմամբ՝ Հայաստանը Բաքվին չի հարվածելու, մինչև ադրբեջանցիները չխփեն Երևանին: «Նկատի ունեցեք մի կարևոր հանգամանք՝ դա այն է, որ Հայաստանը կարող է ԼՂՀ տարածքից հարվածել Բաքվին, բայց Ադրբեջանը միշտ կարող է հարվածել Երևանին, և Երևանը շարունակում է մնալ Ադրբեջանի թիրախում Իջևանի կողմից՝ այլ համակարգերով, որոնք իհարկե «Իսկանդերից» ուժեղ չեն, բայց նույն ծավալի ավերածություններ կարող են առաջացնել»:
Անդրադառնալով հարցին, թե ամեն դեպքում սա որպես զսպիչ գործոն հանդիսացա՞վ, թե՞ ոչ, կարողացա՞վ որոշակի տրամադրություններ ձևավորել Ադրբեջանում, Հ. Մարտիրոսյանը պատասխանեց. «Իհարկե ոչ: Միջնորդավորված ձևով Սիրիան ևս ունի «Իսկանդեր», ունի բալիստիկ հրթիռներ, որոնք պատկանում են Ռուսաստանին, բայց գործում են հօգուտ Սիրիայի, Սիրիան ունի ռուսական բալիստիկ հրթիռների աջակցությունը: Տեսանք, որ գեղեցիկ շոուներ արվեցին և ծովից արձակվեցին… Բայց որևէ մեկը դրանից չի զսպվել, և պատերազմը շարունակվում է»:
«Ես բոլորովին չեմ արժեզրկում, հրաշալի է, որ Հայաստանն ունի հրթիռային համակարգեր, և ես դրա համար չափազանց ուրախ եմ, բայց հույս դնել դրա վրա և ինքնախաբեությամբ զբաղվել, ասել, որ սա զսպիչ մեխանիզմ է, պատերազմ չի լինի… Եթե ատոմային ռումբ ունենայինք, էլի հարց կլիներ՝ պատերազմ կլինի, թե ոչ, որովհետև հաստատ չէինք կարողանալու օգտագործել այդ ռումբը:
Ադրբեջանը պատրաստ է անգամ «Իսկանդերների» հարվածին, իրենք հաշվարկներ են արել, թե ինչքան կորուստներ կունենան, որովհետև իրենց համար պատմական խնդիր է Հայաստանը և հայկական տարրը տարածաշրջանից վերացնելը, և որևէ «Իսկանդեր» չի կարող իրենց համար արգելք հանդիսանալ: Իսկ մեզ համար դա պատմական խնդիր չէ, այլ գոյութենական խնդիր է»,- նշեց Հայկ Մարտիրոսյանը և հույս հայտնեց, որ մեր ժողովուրդն այնքան իմաստուն կլինի, որ թույլ չի տա՝ տարածքները մնան սակարկման առարկա:
Մանրամասները՝ տեսանյութում: