Հայաստանում Իրանի Իսլամական Հանրապետության արտակարգ և լիազոր դեսպան Սեյեդ Քազեմ Սաջադին վերջերս հարցազրույց է տվել Իրանի լրատվամիջոցներից մեկին և խոսել է նախագահ Ռոհանիի՝ առաջիկայում Հայաստան կատարելիք այցի մասին: Դեսպանը հայտարարել է, որ դեսպանի այցը շրջադարձային է լինելու հայ-իրանական հարաբերություններում: Այս այցը կլինի Իրանի նախագահի առաջին այցը Հայաստան:
Թեմայի շուրջ «Առաջին լրատվական»- ի հետ զրույցում իրանագետ Աննա Գևորգյանը նշեց, որ Ռոհանիի՝ Հայաստան կատարելիք այցի վերաբերյալ սա առաջին հայտարարությունը չէ, բայց նախորդ հայտարարությունները հայտարարության մակարդակով էլ մնացել են:
«Այս անգամ Իրանի նախագահը Հայաստանի արտգործ նախարարի ներկայությամբ է հայտնել Հայաստան այցելելու իր մտադրության մասին: Մանրամասներ հայտնի չեն, թե երբ է տեղի ունենալու այցը, բայց նախագահը նշել է, որ այցի նպատակը Հայաստան – Իրան երկկողմ փոխգործակցության ընդլայնումն է, ինչպես նաև տարածաշրջանային խնդիրների բարձրաձայնումը, քննարկումը: Այս իմաստով սա շատ սպասված և մի փոքր ուշացած հնադիպում է: Հուսով ենք՝նախկինում ձեռքբերված պայմանավորվածությունները կյանքի կկոչվեն, և կունենանք նոր պայմանավորվածություններ՝ տնտեսական և քաղաքական, և կգրանցի դրական արդյունք: Տրանսպորտային միջանցքի հարցը տվյալ պահին և՛ Իրանի, և՛ տարածաշրջանի մյուս երկրների համար գլխավոր հարց է, այդ հարցը ևս կքննարկվի»,- նշեց իրանագետը:
Իրանագետի հավաստմամբ՝ Իրանի դեսպանը Հայաստանում ակնարկել է, որ Իրան – Հայաստան – Վրաստան – Բուլղարիա – Հունաստան փոխգործակցության շրջանակի ավելի ընդլայնման հնարավորություններ կան, և այդ մասին քննարկումներ պետք է լինեն: «Իրանը դեպի Եվրոպա տանող դիվերսիֆիկացիա է ուզում իրականացնել և ունենալ փաստաթղթեր, որոնք կապահովեն կապը Եվրոպայի հետ, և իսկապես կան հնարավորություններ, որոնք եթե կյանքի կոչվեն, և՛ տնտեսական, և՛ քաղաքական առումով Հայաստանի և Իրանի համար շահեկան կլինեն»,- նշեց Ա. Գևորգյանը:
Իրանագետը նշեց, որ հաճախ զուգահեռներ են անցկացվում Իրան – Հայաստան և Իրան – Ադրբեջան հարաբերությունների միջև, սակայն պետք է նկատի ունենալ, որ տարբեր գործոններ են ազդում այդ հարաբերությունների վրա: «Ադրբեջան – Իրան փոխգործակցության հիմնաքարային գործոնը իսլամական գաղափարախոսությունն է, իսկ Հայաստան – Իրան փոխգործակցության հիմքում ընկած է Իրանի քաղաքական դերի մեծացումը տարածաշրջանում, նաև երկրի հեղինակության հարցը. Հայաստան – Իրան հարաբերությունները կարծես դառնում են փիար գործիք Իրանի արտաքին քաղաքականության համար՝ ցույց տալով, որ իսկապես նրա գաղափարախոսությունը ամեևին չի խոչընդոտում ունենալ լավ, բարիդրացիական հարաբերություններ քրիստոնյա երկրների հետ,- ընդգծեց իրանագետը՝ հավելելով, որ Ադրբեջանի հետ Իրանի հարաբերություններում շիական գործոնը որոշակի խնդիրներ է հարուցում»:
Մանրամասները՝ տեսանյութում:
