Վանաձորը տարբեր պատճառներով դեռ չի վերականգնել իր բարի համբավը իր տեղն ու դերը տնտեսական, սոցիալական, քաղաքական կյանքում: Դա բնավ վանաձորցիների մեղքով չէ: Ինչ վերաբերում է ընտրությունների ընթացքում փոխադարձ մեղադրանքներին, պետք է ընտելանանք դրան, կարևորը՝ օրենքի տառն ու ոգին պահպանվի,- այս մասին «Առաջին լրատվական»- ի հետ զրույցում ասաց Լոռվա նախկին մարզպետ Վիգեն Խաչատրյանը: Անդրադառնալով ՏԻՄ ընտրությունների շեմին Էջմիածնում և Գյումրիում տեղի ունեցած միջադեպերին Վ. Խաչատրյանը նշեց, որ չպետք է ընտելանալ թերություններին, այդ ամնենը հոռի բարքերի արդյունք է, որից պետք է ձերբազատվել: Նրա խոսքով՝ այդ երևույթները նաև իշխանության բացթողումների մասին են վկայում:
Լոռու նախկին մարզպետի կարծիքով՝ այն, ինչ տեղի է ունենում կառավարությունում, վստահություն չի ներշնչում, որ տեղի են ունենալու էական փոփոխություններ. «Հստակ չասվեց, թե ինչով էր պայմանավորված նոր վարչապետի նշանակումը: Այն, որ մենք թարմության կարիք ունենք տնտեսական, սոցիալական քաղաքական կյանքում, հասարակական հարաբերություններում՝ լավ իմաստով, ակնհայտ էր, այդ հրամայականը կա, և գործող իշխանական կառույցները չեն բավարարում օրվա հրամայականներին:
Մենք ունենք 25 տարվա ընթացքում կուտակված թերությունների, բացթողումների ծանրագույն բեռ: Նոր վարչապետը ծանրաբեռնված չէ այդ բեռով, պատասխանատվություն չի կրում անցյալի համար, բայց մի մարդը ոչինչ չի անի, եթե ամբողջ քաղաքական վերանախավը չլծվի նոր քայլերի:
Հայաստանում այնպիսի դրվածք է որդեգրված, որ իրականում մենք կառավարության երկու թիմ ունենք՝ մի հատվածը ենթարկված է նախագահին, մյուսը՝ վարչապետին: Եթե վարչապետը և նախագահը նույն քաղաքականությունը չվարեն, մենք արդյունք չենք ունենա: Այն, որ Ս. Սարգսյանն ասում է, որ վարչապետը փոփոխությունների ալիքի առաջնորդը պիտի լինի կամ բարեփոխումների խորհրդանիշը պիտի դառնա, եթե դա ասվում է, որպեսզի վստահություն ներշնչվի դեպի վարչապետը, վատ չէ, բայց իրականում եթե փոփոխությունների առաջնորդը չլինի նախագահը, այդ փոփոխությունները չեն լինի կամ ցանկալի արդյունք չեն տա: Մեկ թիմ պետք է գործի՝ որը պետք է երկու առաջնորդ ունենա՝ ի դեմս նախագահի և վարչապետի: Շանթարգելի կամ քավության նոխազի դերում վարչապետ «օգտագործելը» ոչ մի լավ բանի չի բերում, 25 տարի այդ փորձը կիրառվում է»,- նշեց Վիգեն Խաչատրյանը:
Փոփոխությունները ինչի՞ն կարող են միտված լինել, և վարչապետին տրվա՞ծ է բացարձակ ազատություն. այս հարցերին Վիգեն Խաչատրյանը չցանկացավ պատասխանելանել, նշեց, որ ամեն ոք ունի իր գործելաոճը. «Ավելի լավ է գործունեությունը լինի թափանցիկ և բաց, քան թե համապատասխանի ընդունված կանոններին, եթե ամեն ինչ օրենքի սահմաններում է, ոճը կարող է լինել ազատ, այդ առումով վարչապետի վարքագիծը ինձ հաճելի է, առաջին տպավորությունները դրական են, մենք դերի մեջ մտած դեմքերից հոգնել ենք: Մենք փոքր պետություն ենք, և այստեղ պակասում է թափանցիկություն»:
Վ. Խաչատրյանի խոսքով՝ հասարակությունում տիրող ընդհանուր մթնոլորտն այնպիսն է, որ մարդիկ ինչ-որ բանից ուզում են օգտվել, իսկ բարեփոխումների իմաստը պետք է լինի օգտվելու ինստիտուտի վերացումը, հավասարության իրավունքի և օրենքի գերիշխանության արմատավորումը:
«Ինչպես իշխանության ձգտողները այնպես էլ իշխանություն ունեցողներն անում են այնպիսի բաներ, որոնք անընդունելի են: Փոփոխություն օդի ու ջրի պես պետք է մեր ժողովրդին, որպեսզի վիճակ փոխվի մեր երկրում: Մենք հասել ենք նրան, որ Հայաստանի քաղաքացիների մեծամասնությունը սեփական, հարազատ երկրում անկոչ հյուրի կարգավիճակում է ապրում. սա պետք է հաղթահարվի գործով»,- ընդգծեց Վ. Խաչատրյանը:
Մանրամասները՝ տեսանյութում: