Արարատի և Վայոց Ձորի մարզերի ընդհանուր իրավասության դատարանում Գրիգոր Հովհաննիսյանի նախագահությամբ ընթանում է Անդրանիկ Ղ.-ի ու Նարինե Ն.-ի գործի դատական քննությունը:
Ըստ մեղադրանքի՝ մարզի չափահաս բնակչուհի Նարինե Ն.-ն «Օդնոկլասնիկի» կայքի միջոցով ծանոթացել է նույն մարզի անչափահաս բնակիչ Անդրանիկ Ղ.-ի հետ:
Վերջինիս կողմից Նարինեն ստացել է մտերմություն անելու առաջարկ:
Նարինեն, առաջադրված մեղադրանքի համաձայն, պայման է առաջադրել՝ իր հետ մտերմություն անելու դիմաց նա Անդրանիկից պահանջել է իրեն փոխանցելու նպատակով ձեռք բերել կանեփի բույսերից պատրաստված թմրամիջոց:
Անդրանիկը Նարինեի պահանջը կատարելու համար 2015 թվականի սեպտեմբերի 11-ին գնացել է Արարատի մարզի դաշտերը, գտել է ինքն իրեն աճած կանեփի թփեր, բույսի գլխիկներից ու թփերից պոկելու եղանակով ապօրինի ձեռք է բերել խոշոր չափով՝ 106,45 գրամ «Մարիխուանա» տեսակի թմրամիջոց, որը լցրել է պոլիէթիլենային տոպրակի մեջ:
Այնուհետև Անդրանիկը, ըստ մեղադրանքի, զանգահարել է Նարինեին, հայտնել է, որ թմրամիջոցը ձեռք է բերել: Պայմանավորվել են հանդիպել Արտաշատ քաղաքի թատրոնի շենքի դիմաց:
Դրանից հետո նույն օրը Անդրանիկը հիշյալ թմրամիջոցը վերցնելով՝ գնացել է պայմանավորված վայր՝ թատրոնի մոտ, հանդիպել է Նարինեին, բայց այնտեղ նրանց հանդիպել են նաև ոստիկանները, ովքեր բերման են ենթարկել ու Անդրանիկի մոտ հայտնաբերել են թմրամիջոցը:
Անչափահաս Անդրանիկ Ղ.-ին մեղադրանք է առաջադրվել ՀՀ քրեական օրենսգրքի 266 հոդվածի 2-րդ մասի 2-րդ կետով, իսկ չափահաս Նարինե Ն.-ին՝ ՀՀ քրեական օրենսգրքի 38-266 հոդվածի 2-րդ մասի 2-րդ կետով:
