«Ես շատ անհանգստացած եմ մեր տնտեսության վիճակով: Նախատեսվող բոլոր ծրագրերը ներառվելու են երկու փուլի մեջ»: Այս մասին այսօր լրագրողների հետ զրույցում ասաց ՀՀ նորանշանակ վարչապետ Կարեն Կարապետյանը:
Հարցին՝ ճի՞շտ է, որ վարչապետը չի ցանկանում աշխատել ՀՅԴ-ական նախարարների, մասնավորապես Դավիթ Լոքյանի հետ, վարչապետը պատասխանեց, որ ճիշտ չէ. «Ինձ համար այս պահին ավելի կարևոր է, թե նա ինչ տեսլական ունի, քան այն, թե որ կուսակցության անդամ է»:
Վարչապետը նշեց նաև, որ կան մարդիկ, ովքեր կլքեն կառավարությունը, սական անուններ չնշեց:
Հարցին, թե խաղի նոր կանոննե՞ր են լինելու, Կարապետյանը պատասխանեց. – «Այո, կլինեն խաղի հավասար կանոններ։ Մենաշնորհներին պետք է վերաբերվել հետևյալ կերպ՝ երկրի փոքրությունը բերելու է նրան, որ որևիցե ոլորտում միշտ լինելու է խոշոր խաղացող, այլ խնդիր է, թե խոշոր խաղացողը արդարացի, մրցունակ պայմաններում է առաջանում, թե՞՝ ադմինիստրացիոն կերպով։ Լինելու են հավասար պայմաններ, եթե մեկնումեկը հաջողակ բիզնես ունենա, մենք իրենից այդ բիզնեսը որևիցե կերպ չենք խլելու»։
Անդրադառնալով այն դիտարկումներին, թե վարչապետն ուղարկվել է Կրեմլից, Կարապետյանն ասաց, որ նման խոսակցություններին արձագանքում է ժպիտով։
Մանրամասները՝ տեսանյութում:
