Ապրիլի 13-ին ոստիկանության Չարենցավանի բաժնում «ինքնասպանված» (հարազատների պնդմամբ` սպանված) Վահան Խալաֆյանի գործով հերթական դատական նիստի ժամանակ քրեական հետախուզության բաժնի նախկին պետ Աշոտ Հարությունյանի պաշտպան Սեդա Սաֆարյանը դատարանից խնդրեց` ՀՀ քրեական օրենսգրքի 309-րդ հոդվածի 3-րդ մասով (իշխանազանցությունը, որն առաջացրել է ծանր հետեւանքներ պատժվում է պատժվում է ազատազրկմամբ` 6-10 տարի ժամկետով` որոշակի պաշտոններ զբաղեցնելու իրավունքից զրկելով` առավելագույնը 3 տարի ժամկետով) անպարտ ճանաչել իր պաշտպանյալին եւ ազատ արձակել հենց դատարանի դահլիճից. նրա հիմնավորումն այն է, որ դեպքի օրը կասկածյալների հետ տարվող աշխատանքները հիմնականում կոորդինացրել են ոստիկանության Չարենցավանի բաժնի պետ Նորիկ Հեբոյանը եւ նրա օպերգծով տեղակալ Սամվել Տոնոյանը, իսկ իր պաշտպանյալն այդ ընթացքում գողոնը Էջմիածնից բերելու նպատակով կեսօրից մինչեւ մոտավորապես ժամը 16.30-ը բացակայել է բաժնից: Պաշտպանը միաժամանակ նշել է, որ եթե նույնիսկ Աշոտ Հարությունյանը ապտակած էլ լինի, ապա նրան առաջադրված մեղադրանքը պետք է վերաորակվի 309 հոդվածի 2-րդ մասով, որը նախատեսում է 2-6 տարվա պատիժ` բռնությամբ զուգորդված իշխանազանցության համար, առավելագույնը 3 տարի պաշտոններ չզբաղեցնելու պարտադրանքով: Նշենք նաեւ, որ մեղադրողը Աշոտ Հարությունյանի համար պահանջել էր 8 տարվա ազատազրկում, մինչդեռ նա եւ նրա պաշտպանը մինչ օրս էլ պնդում են, որ դա «ինքնասպանություն» չի եղել:
Ամբաստանյալներ, ՔՀԲ-ի նախկին օպերլիազորներ Գագիկ Ղազարյանի եւ Գարիկ Դավթյանի պաշտպանը նոյեմբերի 11-ի նիստում եւս դատարանից պահանջեց անպարտ ճանաչել իր պաշտպանյալներին, որոնց համար մեղադրողը պահանջել էր 1,5-ական տարվա պայմանական պատիժ: Իսկ ահա Մորիս Հայրապետյանի պաշտպանը առողջական խնդիր ունենալու պատճառով խնդրեց հետաձգել իր պաշտպանական ճառի լսումը: Նիստը հետաձգվեց մինչեւ նոյեմբերի 22-ը, ժամը 16.00-ը: