ԱՄՆ իշխանությունները 3 մլն դոլար պարգևատրում են հայտարարել ԴԱԻՇ-ի առաջնորդներից մեկի՝ Տաջիկստանի ՆԳՆ հատուկ նշանակության ստորաբաժանման նախկին ղեկավար Գուլմուրոդ Խալիմովի գտնվելու վայրի մասին տեղեկության համար: Այդ մասին հայտնում է Պետդեպը:
«Խալիմովը Տաջիկստանի հատուկ նշանակության ստորաբաժանման նախկին գնդապետ է, ոստիկանության ղեկավար և ռազմական դիպուկահար: Նա եղել է Տաջիկստանի ՆԳՆ ոստիկանական հատուկ նշանակության ստորաբաժանման հրամանատար: Հիմա նա ԴԱԻՇ-ի անդամ է և զբաղվում է հավաքագրմամբ (գրոհայինների)»,- ասվում է Պետդեպի հաղորդագրության մեջ:
Գերատեսչության տվյալներով՝ 2015 թ. մայիսին Խալիմովը հրապարակել է 10-րոպեանոց քարոզչական տեսանյութ, որում հայտարարել է, որ ինքը կռվում է ԴԱԻՇ-ի կողմից:
ԱՄՆ իշխանությունները Խալիմովին ահաբեկիչների ցուցակում ներառել են 2015 թ. սեպտեմբերին, իսկ 2016 թ. փետրվարին նա ներառվել է ՄԱԿ-ի համապատասխան պատժամիջոցային ցուցակներում: Խալիմովին հետախուզում են նաև Տաջիկստանի իշխանությունները, իսկ Ինտերպոլը 2015 թ. հունիսին նրան ընդգրկել է հետախուզվող անձանց ցուցակներում ձերբակալման և Տաջիկստան արտահանձնման համար: