Գերմանիայում «հեղաշրջումը»՝ ուղղված կանցլեր Անգելա Մերկելի դեմ, ամենաթեժ կետում է, թեկուզև այն ընթանում է աննկատ՝ գրում է Die Welt-ը։
«Մերկելի մայրամուտը, որը կանխագուշակվել էր մի քանի ամիս առաջ, կարծես թե դանդաղ դուրս է գալիս իր թաքնված շրջանից»,- գրում է հոդվածագիր Հենրիկ Մ. Բրոդերը։
Նրա խոսքով՝ դա տեղի չի ունենում այն պատճառով, որ «Քրիստոնեա-սոցիալական միության» ղեկավար Հորսթ Զեեհոֆերը «սղոցում է նրա գահը», և ոչ այն պատճառով, որ փոխկանցլեր Զիգմար Գաբրիելը հայտարարում է «ինտեգրման վերին շեմի» մասին՝ լռելով միգրացիոն ճգնաժամում սեփական կուսակցության դերի մասին։ Նա գլխավորում է Գերմանիայի Սոցիալ-դեմոկրատական կուսակցությունը։ Պատճառը նույնիսկ այն չէ, որ դաշնային կանցլերը կարծես թե սկսել է վերջապես հասկանալ իր հնարավորությունների սահմանները։ «Ամեն ինչ շատ պարզ է։ Մերկելի դեմ հեղաշրջման փորձն ամենաթեժ կետում է։ Չնայած առաջին հայացքից դա նման չէ դրան»,- հաստատում է Բրոդերը։
Անգելա Մերկելի դեմ դժգոհությունը իր միգրացիոն քաղաքականության ֆոնին աճում է արդեն վաղուց։ Ինչպես նշել է The Guardian-ը գերմանացի խորհրդարանականի մասին հոդվածում, ով, որոշ վերլուծաբանների կարծիքով՝ կարող է փոխարինել Մերկելին կանցլերի պաշտոնում, եթե նախկինում ցանկացած իրավիճակում Մերկելը կարող էր հույս դնել սեփական կուսակցության վրա, ապա այժմ՝ փախստականներին առնչվող ճգնաժամի մեկնարկից մեկ տարի անց, նրա ազատական դիրքերին հակադրվում են նույնիսկ սեփական կուսակցությունում։