Թուրքական Hürriyet թերթի փոխանցմամբ՝ Անկարայում Կուբայի դեսպան Ալբերտո Գոնսալես Կազալսը հայտարարել է, որ Կուբան անընդունելի և թուրք-կուբայական հարաբերությունների ոգուն չհամապատասխանող է համարել Թուրքիայի խորհրդարանի նախագահ Իսմայիլ Քահրամանի հայտարարությունը, ով լատինաամերիկացի հեղափոխական Էռնեստո Չե Գևարային անվանել էր մարդասպան ու ավազակ:
«Խորհրդարանի նախագահի այդ հայտարարությունն անընդունելի է: Ես ցանկանում եմ հավատացնել, որ դա մեծապես կապված է Չե Գևարայի պատմության չհասկացվածության ու խեղաթյուրման հետ: Նա խորհրդանիշ է ոչ միայն Կուբայի համար, այլև ողջ Լատինական Ամերիկայի:
Նման հայտարարությունները չեն համապատասխանում Կուբայի ու Թուրքիայի միջև բարեկամական հարաբերություններին: Անգամ Կուբայի ոխերիմ թշնամիները նման կտրուկ խոսքեր չեն ասել Չե Գևարայի մասին:
Դրա համար էլ մենք շատ ենք զարմացած նման հայտարարությունից: Մենք չենք պահանջում, որ մեր գաղափարները լինեն ընդհանուր: Մենք միայն խնդրում ենք հարգել մեր խորհրդանիշները»,- հայտարարել է դեսպանը: