Deutsche Welle-ի փոխանցմամբ՝ Գերմանիայի արտգործնախարար Ֆրանկ-Վալտեր Շտայնմայերը միջնորդավորված ձևով սպառնացել է, որ Բունդեսվերը կհրաժարվի ԴԱՒՇ-ի դեմ պայքարի գծով միջազգային առաքելությանը հետագա մասնակցությունից, Թուրքիայի տարածքում գտնվող «Ինջիրլիքի» բազան օգտագործելուց, եթե պաշտոնական Անկարան շարունակի խոչընդոտել Բունդեսթագի պատգամավորների այցը «Ինջիրլիք», որտեղ բազավորված են նաև գերմանական ինքնաթիռները:
Շտայնմայերը ARD հեռուստաընկերության եթերում հայտարարել է, որ երբ Բունդսթագը դիտարկելիս լինի Թուրքիայում գերմանացի զինծառայողների տեղակայման մանդատի երկարաձգման հարցը, համապատասխան հանձնաժողովների պատգամավորները պետք է հնարավորություն ունենան բազա այցելելու:
Շտայնմայերը հայտարարել է, որ ձգտելու է համոզել թուրքական իշխանություններին, որպեսզի նրանք գերմանացի պատգամավորներին թույլատրեն այցելել «Ինջիրլիքի» բազա:
Դրա հետ մեկտեղ՝ Շտայնմայերը հերքել է իր թուրք գործընկեր Մևլյութ Չավուշօղլուի պահանջը, որն ավելի վաղ հայտարարել էր, որ Բունդեսթագի պատգամավորներին կթույլատրեն Թուրքիա մուտք գործել միայն այն դեպքում, եթե Գերմանիայի կառավարությունը հետ վերցնի Հայոց ցեղասպանությունը ճանաչող բանաձևը:
«Ես ուղիղ կապ չեմ տեսնում այստեղ և քանիցս այդ մասին հայտարարել եմ թուրք գործընկերներին»,- այդ կապակցությամբ ասել է Շտայնմայերը:
«Ինջիրլիքի» ավիաբազայում գտնվում են Բունդեսվերի հետախուզական ինքնաթիռները և մեկ օդային լիցքավորիչ, ինչպես նաև մոտ 250 զինծառայող: Առաքելության մանդատը լրանում է այս տարվա դեկտեմբերին: