Georgia Online-ի փոխանցմամբ՝ Վրաստանի արտգործնախարար Միխայիլ Ջանելիձեն հայտարարել է, որ եթե որևէ ընկերություն խախտում է Վրաստանի օրենսդրությունը, ապա համապատասխան մարմինները պետք է հետաքննեն դա:
Ջանելիձեն այդպես է պատասխանել Վրաստանում ռուսական «Յանդեքս» տաքսու գործունեության վերաբերյալ հարցին: Վրաստանում շատերը նրան մեղադրել են «Օկուպացված տարածքների մասին» օրենքը խախտելու համար:
Ջանելիձեն պարզաբանել է, որ Վրաստանում բիզնեսն ու բիզնես միջավայրը ազատ են բոլոր ընկերությունների համար, որոնք գործում են վրացական օրենսդրության պահպանմամբ, և որ դա մասնավորապես վերաբերում է ռուսական ընկերություններին:
«Եթե գրանցվել են Վրաստանի օրենսդրության խախտման փաստեր, ապա դրանք պետք է հետաքննեն համապատասխան մարմինները: ԱԳՆ-ն չի հետաքննում նման փաստերը»,- ասել է նա:
Ավելի վաղ հաղորդվել էր, թե «Յանդեքս» տաքսու քարտեզներում Աբխազիան ու Հարավային Օսիան պատկերված են որպես առանձին երկրներ, ինչը հարուցել է բազմաթիվ վրացիների դժգոհությունը, որոնք «Յանդեքս» տաքսին անվանել են «Օկուպացման» տաքսի:
