Թուրքական Anadolu լրատվական գործակալության փոխանցմամբ՝ Սիրիայի քրդերի ինքնապաշտպանական ուժերը չեն լքել Եփրատ գետի արևմտյան ափում գտնվող իրենց դիրքերը, և Եփրատի արևելյան ափը նրանց զանգվածային անցման մասին տեղեկատվությունը չի համապատասխանում իրականությանը: Այս մասին հայտնել է լրատվամիջոցի ռազմական աղբյուրը:
Աղբյուրի խոսքով՝ քրդերն ԱՄՆ-ի քաղաքական կամ ռազմական աջակցությամբ ամրապնդում են իրենց դիրքերը:
Հետախուզական տվյալները վկայել են, որ քրդերը չեն ցանկանում թողնել Եփրատի արևմտյան ափին գտնվող Մանբիջի շրջանում իրենց դիրքերը. «Նրանք հեշտորեն քողարկվում են՝ կրելով Սիրիայի ժողովրդավարական ուժերի համազգեստ և օգտագործելով տվյալ խմբավորման տարբերանշանը:
Այդ ամենը թե՛ զինյալներին, թե՛ ԱՄՆ-ի ղեկավարությանը հնարավորություն է տալիս պնդելու, թե տարածաշրջանում չեն մնացել քրդերի ինքնապաշտպանական ուժերի ներկայացուցիչներ»:
