Սիրիայում և Իրաքում հայտնաբերվել է ԴԱԻՇ-ի գրոհայինների զոհերի ավելի քան 70 զանգվածային գերեզմանոց: Այս մասին հայտնում է Associated Press-ը՝ հղում անելով սեփական հետաքննությանը:
«Բացառիկ հարցազրույցներում, լուսանկարներում և հետաքննություններում Associated Press-ը հաստատում է, որ հայտնաբերվել է ԴԱԻՇ-ի ծայրահեղականների թողած 72 զանգվածային գերեզմանոց… Հավանական է, որ դեռ շատ գերեզմաններ կհայտնաբերվեն ԴԱԻՇ-ի նահանջից հետո»,- հայտնում է գործակալությունը:
Associated Press-ի տվյալներով՝ Սիրիայում հայտնաբերվել է եղբայրական գերեզմանների տեղակայման 17 վայր, որոնցից մեկում թաղված են հարյուրավոր մարդիկ: Նշվում է, որ Իրաքի տարածքում մոտ 16 այդպիսի գերեզմաններում թաղվածների թիվը գործնականում հնարավոր չէ պարզել. դրանք գտնվում են չափազանց վտանգավոր վայրերում՝ քանդելու համար: Պաշտոնական տվյալներով՝ այդպես թաղված զոհերի մարմինների թիվը տատանվում է 5.200-ից մինչև ավելի քան 15.000-ի սահմաններում:
Վիզուալ հետախուզությամբ զբաղվող AllSource Analysis ընկերությունը գործակալությանը տրամադրել է արբանյակային բացառիկ լուսանկարներ, որոնցում երևում է ևս մեկ գերեզմանոց Իրաքի Մոսուլ քաղաքից ոչ հեռու՝ Բադուշ բանտի շրջանում: Այնտեղ թաղված է ավելի քան 600 կալանավոր:
Գործակալության տվյալներով՝ ահաբեկիչները նույնիսկ չեն փորձել քողարկել իրենց զոհերի գերեզմանոցների տեղերը: Գերեզմանոցների չափը մոտ է ֆուտբոլի 2 դաշտի տարածքի: