Լոնդոնի Նոթինգ Հիլլ շրջանում ամենամյա կառնավալի ժամանակ ձերբակալվել է ավելի քան 300 մարդ՝ հայտնել է Լոնդոնի ոստիկանությունը:
Նոթինգ Հիլլում 1964 թվականից ի վեր ամեն տարի օգոստոսի վերջին անցկացվում է կառնավալ՝ հայտնում է RIA Novosti-ն: Կառնավալի գլխավոր մասնակիցները ծագումով Կարիբյան տարածաշրջանից են, որոնք սկսել են բնակվել Լոնդոնի արևմուտքում 1950-ականներից հետո:
Կառնավալի ժամանակ հաճախ գրանցվում են օրինախախտումներ, որոնք կատարվում են հիմնականում հանդիսատեսի կողմից ալկոհոլ օգտագործելու հետևանքով:
«Կառնավալի առաջին օրը (կիրակի) տարբեր իրավախախտումների համար ձերբակալվել է 156 մարդ, երկրորդ օրը՝ 160 մարդ: Ձերբակալությունների մեծ մասը կատարվել է զենքի կրման կամ թմրանյութերի ձեռք բերման կասկածանքով»,- ասված է Սքոթլանդ Յարդի հաղորդագրությունում:
Նոթինգ Հիլլի դիմակահանդեսը Եվրոպայում խոշորագույն փողոցային տոներից մեկն է, որին այցելում են հարյուր հազարավոր մարդիկ: