Բրիտանական Reuters լրատվական գործակալության փոխանցմամբ՝ ԱՄՆ նախագահ Բարաք Օբաման G-20-ի գագաթնաժողովի շրջանակներում հանդիպելու է Թուրքիայի նախագահ Ռեջեփ Էրդողանի հետ՝ քննարկելու համար ոչ վաղ անցյալում Թուրքիայում կատարված ռազմական հեղաշրջման հարցն ու Սիրիայում տիրող իրավիճակը։
Այդ մասին լրագրողների հետ կանոնավոր ճեպազրույցի ժամանակ հայտարարել է ԱՄՆ նախագահի խորհրդական Բեն Ռոդսը։
Նրա խոսքերով՝ Օբամայի ու Էրդողանի հանդիպումը տեղի է ունենալու սեպտեմբերի 4-ին. «Հանդիպման ժամանակ քննարկվելու է նաև փախստականների ճգնաժամը։ Օբաման քննարկելու է ԴԱԻՇ-ի դեմ համատեղ հակաահաբեկչական գործողության հարցը»։
G20-ի առաջնորդների 11-րդ հանդիպումը սեպտեմբերի 4-5-ին անցկացվելու է Չինաստանի Հանչժոու քաղաքում։ Դրանում քննարկվելու են միջազգային տնտեսական համագործակցության պլանները, ինչպես նաև համաշխարհային զարգացման համատեղ ռազմավարությունը։
