Բրիտանացին հանձինս 13-ամյա ջիհադիստի ճանաչել է իր որդուն, որը ԴԱԻՇ-ի քարոզչական հոլովակում գնդակահարել է գերիներին, հայտնում է The Independent-ը։
Տղամարդու խոսքերով` որի անունը չի հաղորդվում անվտանգության նկատառումներից ելնելով, նրա որդի ՋոՋոն ծնվել է 2004 թվականին: Նրա մայրը հայտնի էստրադային ռոք-երգչուհի Սալի Ջոնսն է: Որդու ծնվելուց անմիջապես հետո նրանք բաժանվել են, 45-ամյա Ջոնսը 20-ամյա ներգաղթյալ Ջունաիդ Հուսեյնի ազդեցության տակ իսլամ է ընդունել, նրա հետ ամուսնացել է և մեկնել Սիրիա, որտեղ միացել է ԴԱԻՇ-ի զինյալներին: Նա որդուն վերցրել է իր հետ:
Հետագայում տղան հայտնվել է ԴԱԻՇ-ի քարոզչական հոլովակներից մեկում: Երեք այլ երեխաների հետ միասին նա ատրճանակից կրակում է անպաշտպան քուրդ գերիներին: Նրա իրական անունը չի հաղորդվում, սակայն հոլովակում նրան անվանում են Աբու Աբուդուլա ալ-Բրիտանի` այսինքն ծագումով բրիտանացի:
«Նա խելացի, նորմալ երեխա էր, վազում էր բզեզների հետևից, վազում այգում,- պատմում է բրիտանացին: – Ես պետք է նրան հետ պահեի: Սարսափելի է, որ նրա ուղեղը այդպես լվացել են»: Նրա մոտ ընկերոջ խոսքերով` երեխան «երջանիկ տղա էր, սիրող, հոգատար և հասկացող»: