Ինչպես արդեն հայտնի է, ՏԻՄ ընտրություններին ընդառաջ Գյումրիում կգործի ոչ թե Հանրապետականի շտաբ, այլ Բալասանյանի, ինչը, թերևս, արտահայտությունն է այն բանի, որ Գյումրիում ՀՀԿ-ն այնքան է հեղինակազրկվել, որ գյումրեցիներին որոշել է իր կողմը գրավել այս քայլով:
ԱԺ փոխխոսնակ, ՀՀԿ մամլո խոսնակ Էդուարդ Շարմազանովը, սակայն, չկիսեց մեր այս դիտարկումը՝ հավելելով, որ պարոն Բալասանյանին ոչ միայն ՀՀԿ-ն է առաջադրել. «Սակայն ոչ մեկի համար գաղտնիք չէ, որ Հանրապետականը սատարում է Սամվել Բալասանյանին»:
«Իհարկե, ՏԻՄ ընտրությունները Հայաստանի Հանրապետական կուսակցության համար շատ կարևոր են, որովհետև ՏԻՄ ընտրություններով Հայաստանում մեկնարկում է արդեն ընտրական փուլը»,- «Առաջին լրատվական»-ի հետ զրույցում ասաց Էդուարդ Շարմազանովը:
Շարմազանովը նշեց, որ ՀՀԿ-ն ակտիվ, բաց և հրապարակային մրցապայքարի կողմնակից է, և կարևորեց ու ողջունեց այն հանգամանքը, որ Հայաստանի քաղաքական դաշտի հիմնական խաղացողները և՛ Գյումրիում, և՛ Վանաձորում խաղի մեջ են. «Եվ թող հաղթի այն քաղաքական ուժը, որին ձայն կտան գյումրեցիներն ու վանաձորցիները»:
Ինչ վերաբերում է Ընտրական օրենսգրքի փոփոխություններին, ապա Շարմազանովը նշեց. «Տասը մատնահետքի հետ կապված փոփոխությունները տարեվերջից շուտ չեն լինի, և ֆիզիկապես անհնար է դրա ներդրումը մինչև ապրիլյան ընտրությունները: Իսկ չորս մատնահետքի ներդրման համար պահանջվում է 4 ամիս, ուստի չենք բացառում, որ ներդնենք նոր մեխանիզմներ և աշնանային նստաշրջանում անդրադառնանք Ընտրական օրենսգրքին և մտցնենք որոշակի փոփոխություններ՝ ավելացնելու համար վերահսկողական մեխանիզմները»:
Նրա խոսքով՝ հարցը կքննարկվի նստաշրջանում, եթե ընդդիմադիր գործընկերների հետ կարողանան գալ ընդհանուր հայտարարի: Այնուամենայնիվ, ԱԺ փոխխոսնակը զերծ մնաց կատեգորիկ հայտարարություններից՝ ասելով, որ կքննարկվեն բոլոր հարցերը:
