Տնտեսագետ Վիլեն Խաչատրյանի կարծիքով՝ հուլիսյան իրադարձություններն իրենց բացասական ազդեցությունն են թողել Հայաստանի տնտեսության վրա: Նրա խոսքով՝ ավելի մեծ չափով անկում արձանագրվել էր 2008-2009թթ-ին, որը միջազգային ճգնաժամի արդյունք էր: «Այս տարվա մարտին ցուցանիշները եղել են բարձր, դրանից հետո ամսեամիս անկում է գրանցվել, և կուլմինացիոն կետը եղավ հուլիսին: 2016-ի հուլիսին 4,3 տոկոսով անկում գրանցվեց 2015 նույն ժամանակահատվածի համեմատությամբ»: Այս մասին «Առաջին լրատվական»- ի հետ զրույցում ասաց Վիլեն Խաչատրյանը՝ հավելելով, որ այս տարի տնտեսությունը երկու անգամ ցնցում է ապրել՝ ապրիլին և հուլիսին:
Նրա խոսքով՝ եթե որևէ երկրում քաղաքական ռիսկերն ակտիվանում են, զբոսաշրջային հոսքերը կրճատվում են: Տնտեսության անկման երկրորդ գործոնը, ըստ տնտեսագետի, ներդրումների հետ է կապված. «Մինչև հուլիսի 17-ը խոսվում էր մոտ 800 միլիոն դոլարի հասնող ներդրումների մասին: Ներդրողի համար ամենակարևորը հանգիստ միջավայրն է, որտեղ կարող է շահույթ ապահովվել»:
Վ. Խաչատրյանի դիտարկմամբ՝ երրորդ գործոնը սեպտեմբերին սպասվող Հարկային օրենսգրքի հետ կապված փոփոխություններն են: «Այս գործոնները ստիպում են վերանայել մոտեցումները, սպասել, մինչև ալիքն անցնի: Մարդիկ իրենց տնտեսական վարքագիծը վերանայում են նման ժամանակահատվածներում, տնտեսական ակտիվությունն անկում է ապրում»:
Վիլեն Խաչատրյանն անդրադարձավ նաև Հայաստանի անդամակցությանը ԵՏՄ-ին՝ ընդգծելով, որ ԵՏՄ երկրների ապագան փայլուն չէ. տնտեսագետի կանխատեսմամբ՝ առաջիկա 5 տարիներին բախվելու ենք տնտեսական դժվարությունների:
Մանրամասները՝ տեսանյութում:
