Քաղաքագետ Գևորգ Մելիքյանը «Առաջին լրատվական»- ի հետ զրույցում անդրադարձավ Սիրիայի շուրջ ստեղծված իրավիճակին՝ Թուրքիայի ռազմական ներխուժումից հետո:
Անդրադառնալով հարցերին, թե ինչու Թուրքիան գնաց Սիրիայի տարածք ռազմական ներխուժման, որոնք են Թուրքիայի իրական նպատակները և որն է վերջնպատակը, Գևորգ Մելիքյանը նշեց, որ Թուրքիայի հիմնական գլխացավանքը քրդերն են, որոնք գտնվում են Թուրքիայի և Սիրիայի տարածքում. «Քրդերը նպատակ ունեն վերացնել այն ընդհանուր սահմանագիծը, որ իրենց բաժանում է, և ունենալ ընդհանուր միություն: Թուրքերի հիմնական նպատակը այդ սահմանագիծը պահպանելն է ցանկացած միջոցով, այդ թվում նաև ռազմական: Թուրքերի և քրդերի միջև տարաձայնությունները ձգվում են արդեն տասնյակ տարիներ»:
Ըստ քաղաքագետի՝ կա նաև երկրորդ գործոնը՝ «Իսլամական պետության» դեմ պայքարի հստակ խնդիրը կա: Գևորգ Մելիքյանի դիտարկմամբ՝ ԱՄՆ-ը ԻՊ-ի դեմ պայքարում աջակցում է Թուրքիային, ռուսական կողմը ևս չեզոք դիրք գրավեց, հակադարձող հայտարարությամբ հանդես չեկավ, ընդհակառակը մտահոգություն արտահայտեց և ցույց տվեց, որ այս ժամանակահատվածում իր և Թուրքիայի շահերը և գործողությունների հիմնական ուղղությունները համընկում են:
«ԱՄՆ-ը համաձայնել է համագործակցել ռուսների և թուրքերի հետ այս գործողությունների ընթացքում և տարօրինակ է այն, որ իրանական կողմն էլ դեմ չէ այս համագործակցությանը»,- նշեց քաղաքագետը:
Նրա խոսքով՝ Սիրիայում պատերազմ է բոլորը բոլորի դեմ. դժվար է այստեղ սև ու սպիտակի բաժանել և ասել, թե ով ում դեմ է, մի պահ մեկը մյուսի դեմ է, այնուհետև համագործակցում են: Գ. Մելիքյանի կարծիքով՝ տարածաշրջանային լարվածության ազդեցությունը կարող է պայթյունավտանգ իրավիճակ առաջացնել, որը ցանկալի զարգացում չէ Հարավային Կովկասի համար:
«Հայաստանը պահել է չեզոքություն այս հարցում, լավ է, որ ռուսական կողմը ճնշում չի գործադրել և ստիպել, որ հայկական կողմը հանդես գա այս կամ այն կողմին դատապարտող հայտարարությամբ:
Հնարավոր չէ, որ այս լուրջ աշխարհաքաղքական ցնցումներն ազդեցություն չունենան Հայաստանի վրա»,- ընդգծեց քաղքագետը:
Նա նաև հավելեց, որ Թուրքիայի խնդիրը ոչ թե Ռուսաստանին կամ ԱՄՆ-ին գոհացնելն է, այլ իրավիճակից օգտվելը. «Լավ կլիներ, որ Հայաստանը սրանից դասեր քաղի: Քաղքականությունը ամեն վայրկյան դինամիկ զարգացող երևույթ է, պետք է ամեն վայրկյան պատրաստ լինես քո դրոշը խփել այնտեղ, որտեղ ազատ տեղ կա»:
Մանրաասները՝ տեսանյութում: