«ՀՀ օրենքով պետական պաշտոնյան չպետք է զբաղվի բիզնեսով, բայց օրենքը շրջանցվում է և պետական պաշտոնյաները, նրանց ազգականները և ընտանիքի անդամները հայտնվում են բիզնեսներում»,- «Առաջին լրատվական»-ի հետ զրույցում ասաց «Թրանսփարենսի Ինթերնեյշնլ» հակակոռուպցիոն կենտրոնի փոխտնօրեն Վարուժան Հոկտանյանը՝ անդրադառնալով արդարադատության նախարար Արփինե Հովհաննիսյանի դիտարկմանը, թե մրցույթների ժամանակ պետք է հրապարակվի մրցույթին մասնակից ընկերությունների իրական սեփականատերերը։
Հոկտանյանի խոսքերով՝ սա ոչ թե Արփինե Հովհաննիսյանի նախաձեռնությունն է, այլ կոռուպցիայի դեմ պայքարի խորհրդի ժամանակ քննարկված առաջարկ, որը ներկայացվել էր մասնակիցների կողմից։ Հոկտանյանի խոսքերով՝ դա նաև միջազգային փորձ է, որը պետք է փորձ անել կիրառել նաև Հայաստանում։ «Իսկ եթե նայում ենք այն մոտեցումները, որոնք կիրառում է մեր կազմակերպությունը, ապա դրա համաձայն ոչ թե պաշտոնյային պետք է արգելել բիզնեսով զբաղվել, այլ պետք է արգելել նրանց կողմից անհավասար պայմաններ ստեղծելը։ Շատերը կարող են հակադարձել այս մոտեցմանը, քանի որ եթե պաշտոնյան բիզնես ունի, ապա իր կապերը ծառայեցնելով պետք է փորձի իր բիզնեսն առաջ տանել, բայց տեսականորեն սա հնարավոր է»,- հավելեց Հոկտանյանը։
Մեր զրուցակցի խոսքերով՝ լուծումը հետևյալը պետք է լինի՝ կամ պաշտոնյաները պետք է նորմալ աշխատավարձ ստանան, որպեսզի գայթակղություն չառաջանա բիզնեսով զբաղվել, կամ ամենախիստ պետական ու հանրային հսկողության տակ պահել այդ պետական պաշտոնյայի բիզնեսը։
Առավել մանրամասն՝ տեսանյութում։