Լոռու մարզի ընդհանուր իրավասության դատարանում Նարինե Հովակիմյանի նախագահությամբ ավարտվել է Կարեն Դ.-ի գործի դատական քննությունը:
21-ամյա Կարենը մեղադրվում էր շորթման համար՝ ՀՀ քրեական օրենսգրքի 182 հոդվածի 1-ին մասով:
Ըստ դատական ակտի՝ 2015 թվականի ամռանը Կարեն Դ.-ն գտնվել է Ռուսաստանում՝ արտագնա աշխատանքի էր մեկնել: «Օդնոկլասնիկի» սոցիալական կայքի միջոցով, գործով տուժող Նորայի (անունը փոխված է) նախաձեռնությամբ Կարենը ծանոթացել ու մտերմացել է նրա հետ:
2015 թվականի օգոստոսին Կարենը վերադարձել է Հայաստան: Մշտական աշխատանք չունենալով՝ իրեն պատկանող մեքենայով Վանաձորում զբաղվել է գյուղատնտեսական մթերքների շրջիկ առևտրով:
Մթերքները նա ապառիկ կարգով գնել է վանաձորցի Սամվել Մ.-ից:
Սեպտեմբերի սկզբին Կարեն Դ.-ն Վանաձորում անսպասելիորեն տեսել է Նորային, զանգահարել ու հայտնել է, որ ինքը վերադարձել է Հայաստան, նույնիսկ Վանաձորում հեռվից տեսել է նրան:
Նորան Կարենին հրավիրել է իր տուն: Փոխադարձ համաձայնությամբ Կարենը Նորայի հետ սեռական հարաբերություն է ունեցել:
Դրանից հետո, մինչև դեկտեմբեր ամիսը Կարենն ու Նորան հաճախ հանդիպել են վերջինիս բնակարանում և փոխադարձ համաձայնությամբ սեռական հարաբերություն են ունեցել իրար հետ:
2015 թվականի դեկտեմբերի սկզբին Կարենի ձեռք բերած գյուղատնտեսական մթերքները ցրտահարվել ու փչացել են: Կարենը Սամվել Մ.-ին պարտք է մնացել 200 հազար դրամ:
Չկարողանալով սեփական միջոցներով այդ պարտքը վճարել՝ Կարեն Դ.-ն որոշել է իր պարտքի գումարը շորթել սիրուհուց՝ Նորայից:
Ըստ դատական ակտի՝ 2015 թվականի դեկտեմբերից մինչև 2016 թվականի մարտի 1-ն ընկած ժամանակահատվածում շարունակաբար, Նորայի մասին արատավորող տեղեկություններ՝ իրենց հանդիպումների ինտիմ մանրամասները հրապարակելու սպառնալիքով Կարենը Նորայից պահանջել ու շորթել է 190 հազար դրամ ընդհանուր արժողությամբ հինգ կտոր ոսկե զարդեր, որոնք վաճառել ու վճարել է փչացած գյուղմթերքների արժեքը:
Բացի այդ, 2016 թվականի մարտի 8-ին Կարենը Նորային խաբել է՝ իբր նրա ոսկեղենը գտնվում է գրավատանը, գրավի տոկոսները իբր թե վճարելու պատրվակով չարաշահել է Նորայի վստահությունը և նրանից հափշտակել է 30 հազար դրամ արժողությամբ ոսկե շղթա ու կախազարդ:
Այս երկրորդ՝ խարդախության դրվագով՝ ՀՀ քրեական օրենսգրքի 178 հոդվածի 1-ին մասով, 2016 թվականի ապրիլի 15-ին Կարեն Դ.-ի քրեական հետապնդումը դադարեցվել է՝ տուժողի հետ հաշտության հիմքով:
Շորթման մասով Կարեն Դ.-ն իրեն լիովին մեղավոր է ճանաչել ու միջնորդել է գործը քննել արագացված ընթացակարգով:
Տուժողն այդ կարգի դեմ չի առարկել: Դատարանն արձանագրել է, որ Կարեն Դ.-ն հատուցել է տուժողին պատճառած նյութական վնասը:
Կարեն Դ.-ն մեղավոր է ճանաչվել շորթման համար՝ ՀՀ քրեական օրենսգրքի 182 հոդվածի 1-ին մասով, և դատապարտվել է 400 հազար դրամ տուգանքի:
Դատարանը տուգանքի վճարումը տարաժամկետել է 10 ամսով ու պարտավորեցրել է Կարեն Դ.-ին՝ տասն ամսվա ընթացքում յուրաքանչյուր ամիս վճարել 40 հազար դրամ: