Էրեբունի և Նուբարաշեն վարչական շրջանների ընդհանուր իրավասության դատարանում Արտուշ Գաբրիելյանի նախագահությամբ ավարտվել է Արտավազդ Կարապետյանի գործի դատական քննությունը:
Արտավազդ Կարապետյանը Արարատի մարզի Սուրենավան գյուղի գյուղապետի որդին է: Դեպքը տեղի է ունեցել 2015 թվականի սեպտեմբերի 3-ին: Արտավազդ Կարապետյանը մեկուկես ամիս առաջ էր բոլորել 18 տարին:
Նրան մեղադրանք էր առաջադրվել վրաերթի և դեպքի վայրը թողնելու համար՝ ՀՀ քրեական օրենսգրքի 242 հոդվածի 1-ին մասով և 244 հոդվածով:
Դեպքի պահին Արտավազդը վարել է գյուղապետ հայրիկին ամրակցված մեքենան՝ «ՎԱԶ-21214» մակնիշի:
Ըստ մեղադրանքի՝ սեպտեմբերի 3-ին, ժամը 19-ն անց 10-ի սահմաններում Արտավազդ Կարապետյանը հայրիկի մեքենան երկու ուղևորով վարել է Երևանի Ազատամարտիկների փողոցի կողմից Էրեբունի փողոցով դեպի Աթոյան փողոց՝ շուրջ 60 կմ/ժ արագությամբ:
Մոտեցել է Գոգոլի անվան դպրոցի դիմաց գտնվող չկարգավորվող հետիոտնային անցումի գծանշումներին, թույլ է տվել ճանապարհային երթևեկության կանոնների պահանջների խախտում: Հետիոտնային անցումով այդ պահին անցնում էր Իննա Պ.-ն՝ երեք մանկահասակ որդիների հետ: Արտավազդ Կարապետյանը չի արգելակել մեքենան, ճանապարհը չի զիջել անցումով անցնող կնոջն ու երեխաներին և մեքենայի առջևի աջ անկյունային մասով վրաերթի է ենթարկել մոր աջ կողմում գտնվող մանկահասակ Տիգրանին՝ անզգուշությամբ երեխայի առողջությանը պատճառելով ծանր վնաս:
Վրաերթից հետո Արտավազդ Կարապետյանը չի կանգնեցրել մեքենան, երեխային օգնություն ցույց չի տվել, այլ թողել է վրաերթի վայրը ու փախել է:
Ամբաստանյալ Արտավազդ Կարապետյանն իրեն մեղավոր է ճանաչել առաջադրված մեղադրանքներում: Նա հայտնել է, որ մեքենայի մեջ բացի իրենից եղել են մայրը և մորաքրոջ որդին: Վրաերթի վայրից հեռանալը Արտավազդը պատճառաբանել է նրանով, որ մեքենայում գտնվող մոր ինքնազգացողությունը… վատացել էր, ինքը մայրիկին տարել է մորաքրոջ տուն, ուշքի է բերել, ինքն էլ ուշքի է եկել կատարվածից ու սկսել է պարզել, թե որտեղ է ոստիկանության Էրեբունու բաժինը, որ ներկայանա:
Արտավազդի հայրը հայտնել է, որ իրեն՝ որպես գյուղապետի ամրակցված մեքենան ինքը դեպքի օրը հանձնել է որդուն՝ վարելու համար: Վերջինս այդ օրը զանգահարել է իրեն ու ասել է, որ Երևանում՝ Էրեբունի փողոցում վրաերթի է ենթարկել մի երեխայի, բայց վախենալով, որ երեխայի մայրը իրեն կվնասի՝ հեռացել է դեպքի վայրից: Գյուղապետը որդուն խնդրել է ներկայանալ ոստիկանության բաժին:
Վրաերթի ենթարկված երեխայի մայրը հայտնել է, որ երեք մանկահասակ որդիների հետ մոտեցել է հետիոտնային անցումին: Նայել է, տեսել, որ Ազատամարտիկների փողոցի կողմից դեպի Աթոյան փողոց ընթացող մեքենաներ չկան, աջ ձեռքով բռնել է Տիգրանի ձեռքը, ձախ ձեռքով՝ Պավելի ձեռքը, իսկ Դանիելը բռնել է Պավելի ձախ ձեռքից: Այդպես՝ իջել են մայթից ու սկսել են հատել Էրեբունի փողոցը անցումի գծանշանների վրայով: Որոշ տարածություն անցնելուց հետո նկատել է Ազատամարտիկների փողոցի կողմից արագությամբ իրենց կողմն ընթացող «Նիվա» մեքենա: Ինքը երեխաների հետ կանգնել է գծանշանների վրա՝ համոզվելու համար՝ մեքենան կզիջի՞ իրենց, թե՞ կշարունակի ընթացքը: «Նիվայի» վարորդը մեքենան չի կանգնեցրել, շարունակել է վարել իրենց ուղղությամբ: Ինքը չի հասկացել, թե ինչպես է մեքենան վրաերթի ենթարկել իր աջ կողմում գտնվող Տիգրանին ու շպրտել է ասֆալտին: Վարորդը մի քիչ դանդաղեցրել է ընթացքը, սակայն կանգ չի առել, շարունակել է ընթացքն ու հեռացել է:
Դատաբժշկական փորձաքննության եզրակացությամբ՝ մանկահասակ Տիգրանի առողջությանը վրաերթի պատճառով հասցվել է ծանր վնաս՝ կյանքին վտանգ սպառնացող. ճակատային շրջանի սալջարդ, գլխուղեղի թեթև աստիճանի սալջարդ, աջ ծոծրակոսկրի կոտրվածք…
Արտավազդ Կարապետյանի հեռախոսը վրաերթից հետո մինչև ժամը 21-ն անց 20-ը շահագործվել է Փարաքար գյուղում և «Զվարթնոց» օդանավակայանում տեղադրված ալեհավաքների կողմից…
Արտավազդ Կարապետյանը ոստիկանության Էրեբունու բաժին է ներկայացել 2015 թվականի սեպտեմբերի 3-ին, ժամը 21-ն անց 40 րոպեին… Ոստիկանությունում Արտավազդը հայտարարել է, թե երեխայի վրաերթից հետո մեքենան չի կանգնեցրել՝ վախենալով… հաշվեհարդարից…
Ու երևի այդպես վախենալով էլ հասել է մինչև օդանավակայան…
Այնուամենայնիվ, դատարանը հաշվի է առել, որ երիտասարդը ոստիկանություն է ներկայացել ինքնակամ, ընդունել է մեղքը, դրսևորել է «հետհանցավոր դրական վարքագիծ»…
Տուժող կողմը քաղաքացիական հայցի պահանջ չի ներկայացրել:
Արտավազդ Կարապետյանը մեղավոր է ճանաչվել մեղսագրված արարքների համար ու վերջին հաշվով դատապարտվել է 150 հազար դրամ տուգանքի՝ 2 տարով զրկվելով տրանսպորտային միջոցներ վարելու իրավունքից:
Դատավճիռը չի բողոքարկվել և մտել է օրինական ուժի մեջ:
