Ֆրանսիական մի քանի քաղաքների քաղաքապետեր հայտարարել են, որ մտադիր չեն հետևել Ֆրանսիայի գերագույն վարչական դատարանի որոշմանը, որով դադարեցվում է երկրի լողափերին ողջ մարմինը ծածկող մուսուլմանական լողազգեստ՝ բուրկինի կրելու արգելքի գործողությունը: Այս մասին հայտնում է BBC-ն:
Վերջին 2 շաբաթներին այդպիսի արգելք են սահմանել մոտ 30 քաղաքների իշխանությունները՝ հատկապես Ֆրանսիայի հարավում:
Ֆրանսիայի վարչապետ Մանուել Վալսը պաշտպանել է արգելքը՝ Facebook-ում գրելով, որ բուրկինին «իսլամի քաղաքականության հաստատումն է հասարակական վայրերում»:
Բարձրագույն վարչական դատարանի անդամ Ֆրանսուա Մոլինյեն ֆրանսիական Le Mond պարբերականին տված հարցազրույցում հայտարարել է, որ այն քաղաքների քաղաքապետերը, որտեղ սահմանված է այդ արգելքը, դեռ որոշ ժամանակ կարող են դրան հետևել: Սակայն հետագայում նրանց դեմ կարող են հայցեր ներկայացվել վարչական տրիբունալներում՝ հենվելով Գերագույն վարչական դատարանի վճռի վերաբերյալ իրենց որոշման վրա: