ԱՍԱԼԱ-ի մարտիկ, ՀԽ անդամ Ալեք Ենիգոմշյանն իր ելույթում անդրադարձավ Ազատության հրապարակում հանրահավաքի ընթացքում տեղի ունեցած միջադեպին, երբ հանրահավաքի մասնակիցներից ոմանց վրդովեցրեց ռեժիսոր, հանրային գործիչ Գայանե Գասպարյանի ելույթը, որով նա ղարաբաղցիներին կոչ արեց Երևանից Ղարաբաղ գնալ: Ալեք Ենիգոմշյանը նշեց, որ այսուհետև կարգը կփոխվի, ելույթ ունենալ ցանկացողները 24 ժամ առաջ իրենց ելույթի բովանդակությունը կներկայացնեն քաղաքական խորհրդին, ապա համաձայնություն ստանալուց հետո միայն ելույթ կարող են ունենալ:
«Սասնա ծռեր» շարժման քաղաքական խորհուրդը դեռ չի հստակեցրել իր ճանապարհային քարտեզը: Ա. Ենիգոմշյանն այսօր՝ օգոստոսի 26-ին Ազատության հրապարակում հայտարարեց, որ հետագա անելիքները դեռ հստակեցման կարիք ունեն, դրանք կհրապարակվեն մոտ ապագայում:
««Սասնա ծռերը» ստեղծեցին մի նոր հույսի շրջան, նոր էներգետիկա, որը շարունակվում է: Այնքան ժամանակ, ինչքան որ գնդի տարածքում էին «Սասնա ծռերը», իրենք էին շարժիչ ուժը, ժողովուրդն այդ ժամանակ մոբիլիզացվեց: «Սասնա ծռերը» շարունակում են մնալ շարժիչ ուժ, բայց քանի որ ներկա չեն, ժողովուրդը, որ շարունակում է պատրաստակամ մնալ, սպասում է անելիքի ուղու հստակությանը: Սա է միակ տարբերությունը: Անելիքները հստակեցվելու են: Ճանապարհային քարտեզը կներկայացվի… բոլորս միասին կլծվենք ակտիվ աշխատանքի»,- ասաց Ալեք Ենիգոմշյանը: Նա նաև նշեց, որ առաջիկա քայլերից մեկը սեպտեմբերին համազգային համաժողովի կազմակերպումը կլինի Հայաստանում: Համաժողովին, նրա խոսքով, կմասնակցեն պայքարողներ, մտավորականներ, սփյուռքահայեր, հայտնի մարդիկ:
«Համաժողովը լինելու է այնպիսին, որտեղ կլինեն հստակ ազգային-քաղաքական օրակարգ, հստակ բանաձևեր, անզիջող բանաձևեր, այնտեղ այսօրվա վարչախմբի հետ եզրեր գնելու մասին խոսք անգամ լինել չի կարող»,- ընդգծեց Ալեք Ենիգոմշյանը:
Մանրամասները՝ տեսանյութում: