ԵՄ երկրների իշխանություններին անհրաժեշտ է քաղաքացիներին վերադարձնել այն զգացումը, որ հենց իրենք են միության տերերը. նոր մարտահրավերներին և իրողություններին ԵՄ-ի հարմարվելու հենց այդպիսի գործընթացին կաջակցի Լեհաստանը: RIA Novosti-ի հաղորդմամբ՝ այս մասին հայտարարել է երկրի վարչապետ Բեատա Շիդլոն:
Ուրբաթ Վարշավա են ժամանել Գերմանիայի կանցլեր Անգելա Մերկելը և Հունգարիայի, Սլովակիայի ու Չեխիայի վարչապետները: Վարշավայում համատեղ մամլո ասուլիսի ժամանակ Լեհաստանի վարչապետը հայտարարել է, որ Վարշավայում հանդիպման մասնակիցները ծրագրում են քննարկել ԵՄ-ի ապագան Brexit-ից հետո:
Շիդլոն նշել է, որ անհրաժեշտ է եզրակացություններ անել Բրիտանիայի հանրաքվեից և փոփոխություններ կատարել, որոնց սպասում են եվրոպացիները, որոշել, թե ինչպիսի բարեփոխումներ են անհրաժեշտ, որպեսզի ԵՄ-ն կարողանա ավելի լավ գործել, և մյուս երկրները միությունը լքելու գայթակղություն չունենան:
«Մենք պետք է անցկացնենք այդ քննարկումը, քանի որ դա այսօր անհրաժեշտ է Եվրոպայի համար, անհրաժեշտ է եվրոպացիների և առանձին երկրների համար: Լեհաստանի համար ուժեղ ԵՄ-ն մեր երկրի զարգացման, անվտանգության երաշխիք է և մեր քաղաքացիների երաշխիքը: Մենք պետք է քաղաքացիներին վերադարձնենք այն զգացողությունը, որ միությունն իսկապես ծառայում է նրանց, և նրանք դրա տերերն են: Իրողություններին և նոր մարտահրավերներին ԵՄ-ի հարմարվելու այդպիսի գործընթացին կաջակցի Լեհաստանը»,- ասել է Շիդլոն:
