ՄԱԿ-ի համալսարանը հրապարակել է զեկույց, որում ներկայացվել են բնական կատակլիզմների ռիսկերը 171 երկրների համար: Այս մասին հայտնում է The Mainichi-ն:
Մնացած զարգացած երկրների համեմատ՝ Ճապոնիան առավել ենթակա է բնական կատակլիզմներից տուժելու ռիսկին, քանի որ գտնվում է ավելի սեյսմավտանգ շրջանում, որտեղ մեծ է ջրհեղեղների հավանականությունը:
Զեկույցի համաձայն՝ Ճապոնիան ուսումնասիրված 171 երկրների շարքում 17-րդ տեղում է: Բնական կատակլիզմների բացասական հետևանքների ռիսկի առավել ենթակա երկրների ցուցակում առաջինը Վանուատուն է՝ կղզի պետություն Խաղաղ օվկիանոսի հարավային մասում: Հաջորդում են Տոնգան, Ֆիլիպինները, Բանգլադեշը:
Ցուցակը կազմվել է ինդեքսի համաձայն, որով նկատի է առնվում երկրաշարժի, ցիկլոնների, ջրհեղեղի, երաշտի և ծովի մակարդակի բարձրացման հետ կապված ռիսկի հնարավորությունը: Ցուցակում ԱՄՆ-ը 127-րդն է, Մեծ Բրիտանիան՝ 131-րդը, Չինաստանը՝ 85-րդը: Բնական կատակլիզմների ռիսկի ամենացածր մակարդակ ունեցող երկիրը Կատարն է: