Նորք-Մարաշում վնասազերծված զինված հանցախմբի գործով կալանավորված, ՊՆ նախկին փոխնախարար Վահան Շիրխանյանի փաստաբան Հայկ Ալումյանը պատրաստվում է առաջիկա օրերին դիմել Մարդու իրավունքների եվրոպական դատարան։ ՄԻԵԴ-ում Շիրխանյանի պաշտպանը երկու բողոք է ներկայացնելու՝ բողոքարկելու է և՛ Շիրխանյանի խափանման միջոցի հարցը, և՛ նրա առողջության հետ կապված խնդիրները։
«Կալանավորումից հետո Շիրխանյանի առողջական վիճակը կտրուկ վատացել է և, մեր կարծիքով, դա քրեակատարողական հիմնարկում վատ վերաբերմունքի դրսևորումներից մեկն է։ Այդ հիմքով էլ մենք հայց ենք ներկայացնում եվրոպական դատարան»,- «Առաջին լրատվական»-ի հետ զրույցում ասաց փաստաբան Հայկ Ալումյանը։
Ինչ վերաբերում է քրեական գործի ընթացքին, ապա փաստաբանն ասաց, որ Շիրխանյանին մի քանի անգամ առաջարկվել է ցուցմունք տալ, սակայն առողջական վիճակի վատ լինելու պատճառով հնարավորություն չի ունեցել ցուցմունք տալու։
Վահան Շիրխանյանի որդին՝ Գրիգոր Շիրխանյանն «Առաջին լրատվական»-ի հետ զրույցում ասաց, որ հայրը դժվարանում է քայլել, առանց օգնության չի կարողանում քայլել։ Լրացուցիչ ստուգումներ է անցել, մոտ տասը անուն դեղորայք է ընդունում, որպեսզի կարողանա մնալ այդ պայմաններում։
Հիշեցնենք, որ Շիրխանյանը ոտքի երակների տրոմբ ուներ, որը բարդացել էր։ Ամիսներ առաջ նրան վիրահատեցին, երակի մեջ ֆիլտր է տեղադրված, սակայն որդու խոսքով՝ դա խնդիրը չի լուծում, քանի որ վերջին արյան անալիզները ցույց են տվել, որ Շիրխանյանի մոտ տրոմբոզի ցուցանիշը մոտ չորս անգամ բարձր է։ «Նորից դեղեր են նշանակել, բայց այդ վիճակում նրան անազատության մեջ պահելը խայտառակություն է։ Դրա համար էլ մենք դիմում ենք Եվրոպական դատարան, քանի որ Հայաստանի արդարադատական համակարգից հույս չունենք»,- ասաց կրտսեր Շիրխանյանը՝ հավելելով, որ իրենք շարունակում են մնալ այն կարծիքին, որ այս քրեական գործը Շիրխանյանի նկատմամբ բացահայտ քաղաքական հետապնդում է:
«Սա քաղաքական հետապնդում է, գուցե նաև էժանագին վրեժխնդրության դրսևորում է, որը ընթացքում ավելի պարզ կդառնա»,- եզրափակեց Շիրխանյանի որդին։
Լուսանկարը՝ Photolure-ի
