Իրանական Mehr լրատվական գործակալության փոխանցմամբ՝ Իրանը ծրագրում է սեպտեմբերին ավարտին հասցնել ինքնաթիռներ գնելու վերաբերյալ ֆրանսիական Airbus ընկերության հետ գործարքը:
Այդ մասին հայտարարել է Իրանի տրանսպորտի նախարար Աբբաս Ախունդին. «Airbus-ի պատվիրակությունը Թեհրան կժամանի օգոստոսի վերջին՝ ավարտելու համար գործարքը, որը համաձայնեցվել է հունվարին Իրանի նախագահ Հասան Ռոհանիի հունվարյան այցի ժամանակ»:
Հունվարին Իրանն ու Airbus-ը հուշագիր են ստորագրել, ըստ որի՝ Թեհրանը 25 միլիարդ դոլարով գնելու է Airbus-ի 118 քաղաքացիական օդանավ:
Ախունդին ընդգծել է, որ Իրանը հուսով է, որ մինչև 2016 թվականի ավարտը ձեռնամուխ կլինի Ֆրանսիայից ինքնաթիռների ներկրմանը, ինչը դրական ազդանշաններ կստանան ԱՄՆ-ից:
Ախունդին չի մանրամասնել այդ ազդանշանները, սակայն Airbus-ի հետ գործարքը կախված կլինի ԱՄՆ-ի արտահանման թույլտվությունից, քանի որ ինքնաթիռների բաղադրատարրերի ավելի քան 10 տոկոսը պատրաստվել է ԱՄՆ-ում:
