Թուրքական T24 առցանց թերթի փոխանցմամբ՝ երեկ, վաղ առավոտյան մեկնարկած Թուրքիայի զինված ուժերի «Եփրատի վահան» ռազմական գործողությանը մասնակցել են նաև երկրի ռազմաօդային ուժերը:
Թուրքական կործանիչները ժամը 06.08-ին մուտք են գործել Սիրիայի օդային տիրույթ և ավիահարվածներ են հասցրել ԴԱԻՇ-ի դիրքերին: 06.10-ին և 06.30-ին թուրքական մարտական ինքնաթիռների ավիահարձակումները շարունակվել են:
Դրանց մասնակցել են F-16 և F4-2020 մարտական ինքնաթիռներ, որոնք թռիչքներ են գործել Դիարբեքիրից, Մալաթիայից ու Ինջիրլիքից:
Ընդգծվում է, որ դա 2015 թվականի նոյեմբերի 24-ին Թուրքիայի ռազմաօդային ուժերի կողմից ռուսական «Սու-24» ինքնաթիռը խոցելուց հետո առաջին դեպքն էր, որ թուրքական մարտական ինքնաթիռները մուտք են գործում Սիրիայի օդային տիրույթ: