«Ազգը պահելու համար պիտի լինի և՛ «Բազե», և՛ էսպիսի շատ երիտասարդական միջոցառումներ»,- «Առաջին լրատվական»-ի հետ զրույցում ասաց ԱԺ նախագահ Գալուստ Սահակյանը՝ անդրադառնալով քննադատություններին, որ հատկապես քառօրյա պատերազմից հետո պետք չէր հերթական «Բազե»-ն կազմակերպել և կարելի էր այդ գումարն ուղղել սահմանամերձ գյուղերից մեկին։ «Այո, պատերազմ էր, ցավալի իրողություն մեզ համար, բայց այդ պատերազմը, այդ ամբողջ իրողությունները մեզ համար դառնում են հետագա կյանքի ճանապարհ։ Կլինի պատերազմ, կլինի երիտասարդական հավաքներ։ Սրանք համախմբում են երիտասարդությանը։
Անդրադառնալով Ընտրական օրենսգրքի հնարավոր փոփոխություններին, ԱԺ նախագահն ասաց, որ իրենք «օրենսդրությունն ապահովել են», սակայն դրանից հետո որոշ ընդդիմադիր գործիչներ որոշեցին բարդացնել վիճակը։ «Այն օրենքը, որը մշակվել էր, հնարավորություն էր ընձեռում, որ ընտրությունների ժամանակ որևէ խախտում չլիներ, բայց որոշ ընդդիամդիր գործիչներ պահանջեցին նոր օրենք։ Մենք ասացինք՝ ցանկացած մեթոդի պատրաստ ենք, իրենք էլ բերեցին վերջին մեթոդը, որի համար անհրաժեշտ էր այդ գումարը, որը պետք է լիներ մինչև սեպտեմբերի 1-ը։ Բայց հիմա պարզվեց, որ գումարը կլինի հունվարին, և արդեն ժամանակ չի լինի դրանով ընտրություններ կազմակերպել»,- ասաց Սահակյանը։ Նրա խոսքերով՝ այն մեխանիզմները, որոնք կան, բացառում են խախտումները։
ԱԺ նախագահը նշեց, որ ինքը ցուցակների հրապարակմանը ամենադեմ մարդկանցից է։ «Ասեմ ինչու եմ դեմ։ Եթե ցուցակները հրապարակվում են, մի անձնավորույթուն, մի քաղաքական թիմ հարյուր հազարների անունից դիմումներ կգրի, որ իրենք ընտրություններին չեն մասնակցել։ Դրանից հետո քանի տարի է պետք, որ այդ ընտրություններն անցնեն»,- ասաց Սահակյանը։
Առավել մանրամասն՝ տեսանյութում։