Փարիզի քաղաքապետ Անն Իդալգոն և նրա հրավերով Ֆրանսիայի մայրաքաղաքում գտնվող Լոնդոնի քաղաքապետ Սադիկ Խանը քննադատել են Ֆրանսիայում սահմանվող՝ բուրկինի (մուսուլմանական լողազգեստ) կրելու արգելքները: TASS-ի հաղորդմամբ՝ այս մասին նրանք հայտարարել են Փարիզում համատեղ մամլո ասուլիսի ժամանակ:
Իդալգոն տեղի ունեցողն անվանել է «իսկական քաղաքական հիստերիա, որն ընդգրկել է նաև երկրի ԶԼՄ-ները»: «Այդպիսի թեմաները վերցնելն ու դրանցից Ֆրանսիայի ներքաղաքական կյանքի իբր կարևորագույն հարցեր սարքելը ԶԼՄ-ների իսկական հիստերիա է, որին պետք է վերջ տալ»,- ասել է Փարիզի քաղաքապետը: «Կան շատ ավելի կարևոր հարցեր, որոնք շտապ լուծում են պահանջում»,- հավելել է նա:
Իսկ Լոնդոնի քաղաքապետը նշել է, որ «կանա՛յք պետք է որոշեն ինչ հագուստ կրել, և այդ առումով ոչ ոք նրանց որևէ բան հրահանգելու իրավունք չունի»:
