Իրանական Tasnim լրատվական գործակալության փոխանցմամբ՝ Իրանի պաշտպանության նախարար Հոսեին Դեհղանը Սպահանում կազմակերպված մամուլի ասուլիսի ժամանակ հայտարարել է, որ Թեհրանը չի ծրագրում գնել ռուսական արտադրության S-400 զենիթահրթիռային համալիրներ:
Դեհղանի խոսքով՝ Իրանն իր կարիքները գոհացրել է Ռուսաստանից S-300 զենիթահրթիռային համալիրներ գնելով. «Մենք համակարգեր ենք արտադրում երեք պայմանով՝ օդային անվտանգության ապահովման համար: Մեծ հեռահարություններում գործելու հարցում առկա թերությունները մենք լրացրել ենք S-300 զենիթահրթիռային համալիրներ գնելով, մենք չունենք այլ համակարգեր գնելու անհրաժեշտություն»:
Դեհղանն այդպիսով վերահաստատեց օգոստոսի 20-ին իր արած այն հայտարարությունը, որ Իրանը չի ծրագրում գնել S-400 զենիթահրթիռային համալիրներ: Դեհղանն ընդգծել է, որ Իրանը ծրագրում է սկսել անօդաչու թռչող սարքերի արտադրություն:
