Երկիր մոլորակի բնակչության թիվը 10 միլիարդի կհասնի արդեն 2053 թվականին։ Այդուհանդերձ Ռուսաստանի և Ուկրաինայի բնակիչների թիվը կկրճատվի 7,9 և 9 միլիոնով, իսկ Ճապոնիայում՝ «ռեկորդային» 24,7 միլիոնով: Այս մասին հայտնել է Բնակչության թվաքանակի հարցերով վաշինգտոնյան բյուրոն (PRB):
«Չնայած ամբողջ մոլորակում ծնելիության հաճախականության ընդհանուր նվազմանը, Երկրի բնակչության աճի արագությունը կմնա բարձր մակարդակում, որը կբավականացնի 10 միլիարդի նշագծին «հասնելու» համար: Անշուշտ, տարբեր տարածաշրջաններում պատկերը զարմանալիորեն կտարբերվի. օրինակ՝ Եվրոպայի բնակիչների թիվը կշարունակի նվազել, մինչդեռ Աֆրիկայի բնակչության թիվը մինչև 2050 թվականը կկրկնապատկվի»,¬- հայտարարել է Բյուրոյի նախագահ և տնօրեն Ջեֆրի Ջորդանը: Այս ոչ կոմերցիոն կազմակերպությունն այսօր գլոբալ մակարդակում ժողովրդագրական իրադրության կանխատեսման աշխարհում առաջատար բյուրոներից մեկն է՝ Երկրագնդի բնակչության աճի վերաբերյալ ամենամյա զեկույցներ և գնահատումներ հրապարակելով 1962 թվանկանից:
PRB¬-ի նոր կանխատեսումների համաձայն՝ մոլորակի բնակչության թվաքանակն արդեն 2050 թվականին կմոտենա 9,9 միլիարդի, իսկ 2053 թվականին այն կանցնի 10 միլիարդի սահմանը: Այդ աճի մեծ մասը բաժին կընկնի Աֆրիկային. վերջինիս բակչության թիվն այդ ժամկետում կաճի մինչև 2,5 միլիարդ: Ամերիկայի բնակիչների թիվը կավելանա ընդամենը 223 միլիոնով, Ասիայինը՝ 900 միլիոնով, իսկ Եվրոպայի բնակիչների թիվը կկրճատվի մոտավորապես 12 միլիոնով: Այդուհանդերձ, բնակչության թվաքանակով երկրների «տասնյակի» առաջին եռյակը կմնա նախկինը՝ Հնդկաստան, Չինաստան և ԱՄՆ:
