ՀՀ ԱԺ փոխնախագահ Էդուարդ Շարմազանովի գլխավորած պատվիրակությունն օգոստոսի 24-ին մեկնել է Տավուշի մարզի հենակետային դիրքեր, ծանոթացել տեխնիկական վերջին ձեռքբերումներին, հրամանատարական անձնակազմի հետ քննարկել մի շարք կարևոր հարցեր: Այս մասին հայտնում են ՀՀ ԱԺ լրատվական ծառայությունից։
Այնուհետև խորհրդարանականներն այցելել են Պառավաքար, Նորաշեն և Չորաթան համայնքներ: Պառավաքար համայնքում կայացած հանդիպման ժամանակ գյուղացիները ներկայացրել են մի շարք խնդիրներ, այդ թվում` խմելու ջրի և խաղողի բերքահավաքին և հանձնմանն առնչվող հարցեր: ԱԺ փոխնախագահը նշել է, որ խաղողի հանձնման խնդիր չկա, քանի որ արդեն պայմանավորվածություն է ձեռք բերվել կոնյակի գործարանի հետ, և գյուղացիները հնարավորություն կունենան հանձնելու խաղողի բերքը:
«Հավատացնում եմ, որ բոլորիս ուշադրության կենտրոնում են ձեր խնդիրները, քանի որ Հայաստանը սկսվում է սահմանից: Եթե ձեր խնդիրները լուծված չլինեն և դուք հզոր չլինեք, Երևանում մենք թույլ կլինենք: Այդ պատճառով էլ ԱԺ նախագահի հանձնարարականով եկել ենք, որ ականջալուր լինենք»,-ընդգծել է Էդուարդ Շարմազանովը:
Նորաշեն համայնքում բարձրացված խնդիրների շարքում նոր կոմբայն ունենալու հարցն էր, որը բարձրաձայնել է 78-ամյա կոմբայնավար Երջանիկ Աթոյանը: Գյուղապետ Գոռ Աբրահամյանը նշել է, որ վերջին տարիներին ավելացվել են հացահատիկի ցանքատարածքները և բերքահավաքի ժամանակ լուրջ խնդիր է ծագում:
«Այս հարցն անպայման կքննարկենք, և եթե պահուստային միջոցներից չկարողանանք գումար գտնել, ուրեմն պատգամավորներով գուցե փորձենք հանգանակություն անել»,-ասել է ԱԺ փոխնախագահը:
Նորաշենցիները խնդրել են նաև ԱԺ-ում հարց բարձրացնել Նորաշեն համայնքը սահմանամերձ ճանաչելու մասին:
«Եկել ենք, որ հաղորդակից լինենք սահմանամերձ համայնքների խնդիրներին, որ ԱԺ առաջիկա նիստում փորձենք բարձրացնել դրանք: Ամենակարևոր հանգամանքն այն է, որ ժողովուրդը խաղողագործությամբ զբաղվելու և մթերելու խնդիր չունի: Երկրորդը կրթության խնդիրն է: Ես կարծում եմ, որ մենք պետք է շատ մեծ ուշադրություն դարձնենք սահմանամերձ համայնքների կրթական օջախներին: Հայրենիքն սկսվում է սահմանից: Մեր պետությունը և ժողովուրդն ունի երեք հիմնասյուն` առաջինը մեր առաքելական, քրիստոնեական կրոնն է և մեր խաչը, երկրորդը` մեսրոպյան գիրն ու գրականությունը, որը մեր կրթությունն ու գիտությունն է և երրորդը մեր սուրն է, այսինքն մեր անվտանգությունը: Եթե մենք կարողանանք սահմանային շրջաններում ամրապնդել առաքելական խաչի, հայոց գրչի և հայոց սրի միասնությունը, ուրեմն մենք անպարտելի ենք»,-նշել է ԱԺ փոխնախագահը:
Պատգամավորներն այցելել են նաև «Տավուշ տեքստիլ» գործարան և ծանոթացել նորարար տեխնոլոգիական համակարգով գործող գործարանի և նրա՝ շուրջ 150 աշխատողով հագեցած աշխատանքային առօրյային: Նշենք, որ առաջիկայում գործարանի աշխատողների թիվը նախատեսվում է կրկնապատկել: